Proceso pa selecciona director financiero nobo pa HOH ta finalisando

ORANJESTAD - Hospital lo nombra dentro poco un Director Financiero nobo. Asina prome minister di Aruba Evelyn Wever Croes a bisa den su mensahe di fin di siman. Riba pregunta di noticiacla.com na e mandatario encarga cu hospital, Dangui Oduber, el a elabora un poco mas. “Nos deseo ta pa busca un directo financiero local, cu experiencia y capaz pa e trabou” Oduber a bisa. No a specifica si ki tempo esaki lo keda cla si, pero prome cu fin di aña. Ademas el a duna un ‘hint’ cu lo cuminsa busca un director medico nobo. 

E PROCESO

Segun e prome minister su mensahe, ‘Lo bin hopi cambio den maneho na hospital y tur esaki pa mehora e servicio y cuido cu nos kier duna na pueblo’. Pa loke ta e proceso pa nombra e director financiero, Oduber a sigura e portal aki cu ‘e proceso ta canando y na e momentonan aki e proceso di selectie ta cabando pa por apunta e director financiero nobo’. E tin cu reemplaza e ex director Theo de Kool cu a wordo retira na hospital. 

E DIRECTOR

Pa loke ta e director mes, Oduber a bisa for di basta tempo caba cu el a bisa esnan responsabel, pa cuminsa busca un director nobo. Recientemente e buskeda a haya mas urgencia ora cu e director actual Ezzard Cillie a bati varios alarma, bisando cu e no por mas y cu e mester di ayudo. Ayudo den sentido cu e ta trahando den un forma cu no ta corecto, refiriendo na e conflicto cu tin pa cu e ley cu a pasa na 2017 deliñando e responsabilidad di e director, mientras cu na 2014 a cera contractonan cu awor no ta cuadra. Y esaki ta pone e director actual den un situacion hopi incomodo ya cu e ta responsabel pa tur cos cu pasa na hospital, particularmente cu e pashentnan y trahadonan den un hospital cu ta den pleno reconstruccion.