Lo habri frontera atrobe porta ora cu visa keda cla

ORANJESTAD – Mientras cu ta evalua e situacion tur dia, na November awor, gobierno di Aruba lo dicidi si ta habri frontera cu Venezuela dia 10 di December proximo. Ademas, Prome minister Wever a bisa noticiacla.com dialuna mainta cu e intencion ta pa acopla e ‘reapertura’ di e frontera cu e introduccion di e visa cu gobierno di Reino a informa siman pasa. Segun Wever, ta premira cu pa maart otro aña esaki por keda cla. Y si ta pa Wever, e ora lo por habri frontera bek. E ‘poder’ pa habri frontera ta keda un asunto di pais segun Wever, pues como tal, Aruba mes ta dicidi esaki. Si cos ‘drecha’, por habri e frontera prome cu esey. 

CERA FRONTERA

Tabata na mei di e aña aki cu gobierno di Venezuela a dicidi cu ta habri frontera pa Aruba atrobe, pero ta mantene esun cu Corsou y Bonaire cera. Aruba e momento ey a dicidi cu e ta cera su frontera cu Venezuela pa 1 luna. Esey a keda prolonga dos biaha caba cu 3 luna cada bez, y e proximo fecha pa esaki vence, ta 10 di December. Wever a bisa noticiacla.com cu na November awor gobierno (aunke ta evalua esaki tur dia) lo dicidi si ta habri e frontera of ta tene cera y ta acople cu e introduccion di visa na maart/april 2020.