Pa vacantie planea di minister y parlamentario, a pospone reunion di Serlimar

ORANJESTAD – E motibo principal cu e reunion di Parlamento riba ley di Serlimar siman pasa a keda posponi, ta pa un minister y un parlamentario bay cu vacantie. Ta trata di minister Otmar Oduber y parlamentario Rocco Tjon. No ta pasobra lo ‘no tabatin suficiente voto pa pasa e ley’. E mandatario Oduber a contesta esaki dialuna pa noticiacla.com indicando cu como cu e no a bay cu vacantie durante reces, (zomer) el a planea esaki awor. Y mirando cu tabatin otro reunion planea pa sigui e dianan benidero, y cu e ta baha cu vacacion diaranson awor, no a keda otro pa pospone esaki ora cu vacacion termina. Parlamento mes, no ta cu vacacion. 

CONFUSION

Durante siman cu a pasa, tabatin hopi rumor pakico a pospone e reunion diaranson siman pasa te dia 15 di October proximo. Esaki pasobra Parlamento no ta bay cu vacantie awor pasobra nan tabatin reces recien caba. E ora a surgi e pregunta pakico a bisa cu ‘e reunion ta sigui te despues di herft vacantie’. Entre e ‘rumornan’, tabata cu no lo tabatin suficiente voto sigura di parti di miembronan di coalicion, y cu lo mester a lobby cu partidonan di oposicion tambe pa logra sigura votonan necesario pasobra ‘no tur partido tabata riba e mesun liña’. E mandatario a sigura cu esey lo no tabata e caso. E reunion ta sigui dia 15 di October pa 9’or di mainta. 

E REUNION

E reunion a haya hopi atencion pasobra e ta indica pa un compania priva (MetaCorp) , cu si e ley aki pasa, dos compania priva cu ta cay bou di MetaCorp lo tin cu cera nan porta, cu tur consecuencia cu esaki lo por tin. E compania ta bringando e intento pa pasa e ley, y ta usando su forma pa logra esaki. Minister Oduber (responsabel pa Serlimar) a mustra cu esaki no ta e miho forma di anda y cu ta lamenta e tipo di actonan di confundi comunidad. Mes momento si, ta trata di democracia bibo, unda cu mientras cu por ta fastioso e ‘ wega di ping pong’, (noticiacla.com a puntra e mandatario pakico esaki ta sigui asina y no ta para esaki si tur cos ta asina cla pa ley’) ta un muestra di democracia bibo y ta keda na comunidad pa husga pa nan mes, kico ta e miho forma di anda.