DUCAPRO: Royalties pa muziek porfin por cuminsa

ORANJESTAD - Dutch Caribbean Performing Rights Organization (DUCAPRO) recientemente a firma un acuerdo cu Buma/Stemra di Hulanda pa e representacion di authornan y compositornan musical. E acuerdo ta aplica pa e islanan Aruba, Curacao, Bonaire. Un aña pasa DUCAPRO a anuncia cu e lo actua na defensa di e derechonan aki y cu e usarionan comercial di muziek, mescos cu na tur pais na mundo, lo mester recompensa e authornan/compositornan pa e uso aki. Casi tur pais tin un organizacion cu ta responsable pa esaki. E acuerdo firma awor ta confirma cu den e parti Caribeño di Reino Hulandes esaki ta DUCAPRO. Confusion a wordo genera den pasado cual organizacion lo ta esun authoriza riba e islanan aki, pero e duda aki awor a wordo aclarea.

DUCAPRO awor lo aserca e usarionan comercial directamente pa sera e acuerdo cu nan pa e uso legal di musica.  No mester lubida cu e usarionan aki ta socionan di e esunan cu tin derecho riba e muziek. Authornan y compositornan local awo tambe lo automaticamente recibi proteccion mundial pa nan trabou pa medio di DUCAPRO y recibi e royalties corespondiente pa e uso comercial di dje. Mas informacion ta disponible riba e pagina: www.ducapro.com.