Amerigo Thode (MFK) declara como sospechoso pa Ministerio Publico

WILLEMSTAD - Ministerio Publico a declara Amerigo Thode (MFK) como sospechoso diaranson. E lo a haya un yamada di un funcionario di Ministerio Publico di su status aunke no a splica pakico. Segun Thode, e ta kere cu e tin di haber cu e denuncia cu a wordo entrega door di presidente di Staten di Corsou, Mike Franco (PAIS) na Ministerio Publico.

Lider di e partido MFK Gerrit Schotte a cataloga e acto aki mesora como un ‘persecusion politico’, aunke no kier a drenta den detayes di con e suseso a tuma lugar. Loke si nan a haci ta para keto na e sistema cu segun nan, Ministerio Publico a bin ta funciona den nos sosiedad. Segun MFK, Ministerio publico ta uza su poder pa sirbi interes nan politico pa trata na masacra MFK. “Tin un cantidad di keho entrega na Ministerio Publico contra politiconan di otro organisacion, pero e keho nan aki no ta wordo investiga. Tin keho entrega na Ministerio Publico contra presidente di banco central Emsley D. Tromp pa actonan sumamente serio, pero e kehonan aki no ta wordo investiga. E unico kehonan cu ta wordo investiga ta esnan cu wordo entrega contra di exponentenan di MFK. Hasta riba kehonan anonimo, si keho cu esun cu ta hacie no ta ni tribi di firma, OM ta actua mesora” Schotte a laga sa. Foto cortesia gerritschotte.com