Corte: Ex director di banco na Corsou ta keda cu huisarest te 2020

WILLEMSTAD-  Ayera e tribunal di Hof a trata e caso di e ex director di Giro Bank, Eric Garcia (79), den un “regie zitting”.  Garcia a apela e sentencia di 4 aña di prison mas 19 miyon florin, cu e lo tin cu paga bek, sino e tin cu sinta 3 aña mas. Manera ta conoci abogado Ornelio “Kid” Martina a logra convence tribunal di Hof pa comberti detencion di ex director di Girobank cera na SDKK den “Huisarest”, despues cu Reclassering a bay wak su situacion den prison y a bisa cu enberdad esaki ta afectando su salud.

Ayera el a presenta den sala di corte. Riba e pregunta di huez van Gink, cu tabata e presidente di e tribunal, dicon el a apela su sentencia, Garcia a bisa cu e castigo ta demasiado halto p’e. El a admiti cu tur loke el a  keda acusa di dje ta cuadra, pero e kier wak toch si por haci algo cu e 4 aña di condena. Garcia a keda condena  pa malversacion como curator, falsificacion di e documentonan di banco Maduro na nomber di Banco Maracaibo N.V. y tambe labamento di placa. Tur esakinan den e periodo di 1 di januari 2010 te cu 20 di juli 2016 na Corsou y tambe Merca.

Segun e acusacion, Garcia lo a malversa un montante di 11 miyon dollar Mericano for di Banco Maracaibo N.V., perhudicando 1500 persona. Den  e veredicto huez a bisa cu Garcia, cu tabata curator y mester a maneha e placa di bancarota di Banco Maracaibo, a transferi e placa pa diferente cuenta bancario den exterior. E placa aki a  bin resulta cerca un compania di inversion na Merca Silver y Hu, di kual esaki a uza pa cumpra 58% di e accionnan den Giro, cu ta e mesun banco cu e acusado tabata maneha como director. Esaki a sosode sin conocemento y sin autorisacion di huez comisario den caso di bancarota di Banco Maracaibo. Garcia a duna di conoce cu ta trata aki di un fiansa. Mirando cu e no tabatin e prueba cu el a fia Silver y Hu e cen, el dicidi di traha un prueba falso pa huez comisario.

Ayera  huez a bisa Garcia cu un di e condicionnan cu el a keda di “schors” tabata cu e lo a paga e fiansa bek.Huez a bisa cu Garcia a sigura esey na varios ocasion. Ayera Garcia a bisa cu su dos yiunan ta bezig pa wak, con nan por acumula e montante pa yud’é paga bek, pero cu e no por priminti esey pa aworaki cu e ta bay logra, mirando cu e mes no ta den posicion pa paga bek. Relaciona cu esaki abogado Martina a bisa cu e kier pa scucha Silver y Hu, pa nan bisa unda e placa a bay

Abogado Martina a pidi tambe pa Garcia keda cu su “ huisarest”, mientras e ta warda tratamento di e caso. Abogado general no a mira e problema pa scucha Hu y Silver, pero a pidi pa rechasa e peticion pa Garcia keda cu e sistema di “huisarest”. Despues cu e tribunal a bay delibera, nan a bin bek y bisa cu nan ta bay di acuerdo pa scucha Hu y Silver, pa sa unda e placa a bay.

Nan lo manda e caso bek pa huez comisario, pa scucha e dos personanan menciona. Pa loke ta trata e peticion pa Garcia keda cu e sistema di “huisarest”, e tribunal a bisa cu nan ta bay di acuerdo cu e abogado, pa motibo cu Garcia ta siguiendo tur e reglanan manera mester ta. El a keda adverti ayera, cu si e faya un biaha mas cu e reglanan, e lo bay bek prison inmediatamente. E caso a keda posponi pa dia  30 di januari pa mitar di 10 di mainta. E dia ey lo bay wak te con leu a yega pa scucha e testigonan y tambe pa despues tende un fecha nobo pa tratamento di e caso. Garcia lo keda den e sistema  di “huisarest “ por lo pronto te dia 30 di januari 2020.

Cortesia Extra.