Hildward Croes a sali pa Colombia en busca di su salud

ORANJESTAD – Conocido musico cu e apodo “El Principe di Aruba” Hildward Croes a biaha diaranson anochi pa Colombia, pa busca su salud. Mientrastanto su amigonan y famia ta organisando e concierto grandi di diadomingo awor esta ‘A Chant for Hope’, 30 di november pa recauda fondo pa su salud. Manera su prima Guissette Croes a elabora e siman cu a pasa, Hildward ta den un situacion cu e mester bringa pa su bida ‘ayera’ y no por a warda mas. Como tal e la biaha pa Colombia pa haci e operacion necesario pa su lomba, den preparacion pa su biahe pa Merca. Diaranson anochi, cu un buelo di air ambulance, Hildward a biaha y ta prepara pa haci su operacion, y spera cu diadomingo awor, comunidad di Aruba sa di respalde den forma masal pa e logra haya fondo necesario pa e proximo operacionnan necesario cu e mester pa por tin sanacion completo di su malesa, cancer.