OM: Investigacion den posibel hecho castigabel den otorgamento di tereno di gobierno

ORANJESTAD – Manera cu noticiacla.com a raporta caba, awe Landsrecherche conhuntamente cu huez-comisario y den cooperacion cu Cuerpo Policial di Aruba, a tene entrada hudicial na diferente lugar. Mientras cu den e comunicado di ministerio publico diaranson atardi nan no ta haci mencion di e identidad di e sospechosonan, noticiacla.com a confirma cu entre nan tin ex minister di gabinete Mike Eman I y II (Benny Sevinger), un coordinador di e gabinete ey (G. Werleman) y un comerciante liga na e partido (L. Arends). 

INVESTIGACION

Segun OM, e huiszoekingnan aki a tuma lugar den cuadro di un investigacion penal di Landsrecherche na posible delitonan di corupcion y otro hechonan castigable posiblemente cometi relaciona cu otorgamento di terenonan di gobierno.  Mas concretamente: e investigacion ta dirigi riba e pregunta si un of mas compania a obtene a base robez (un opcion riba) derechonan di erfpacht di terenonan di Pais Aruba den e añanan 2009 te 2017. Ademas ta investiga e rol di un minister anterior (Sevinger: red) den esaki. 

SOSTEN DI CORSOU

Cu sosten di Landsrecherche Curasoleño a tene tambe un huiszoeking na Curaçao den cuadro di e investigacion. Den e huiszoekingnan documentonan y computadornan a wordo tuma den beslag.  Pa awor no a haci ningun detencion.  Den e simannan venidero e team di investigacion lo entre otro, analisa e contenido di e administracion y e computernan, y sigui pa scucha sospechosonan y testigonan. E investigacion ta ainda den un fase inicial. 

DETENCION

Ministerio Publico no kier ni por bisa na e momento aki ainda si despues lo tin detencion di un of mas sospechoso.  Esey ta depende entre otro di e resultadonan di e investigacion. Ministerio Publico lo no duna mas informacion tocante e identidad di e sospechosonan y/of di e sospechonan specifico cu ta existi contra nan.