SOGA: Hospital ta responsabel pa mantenimiento tanten e no ta renoba

Posted on 10/1/2019, 5:02 PM AST | Updated on 10/1/2019, 5:07 PM AST

ORANJESTAD – Tin un protocol di mantencion firma entre Stichting Onroerend Goed Aruba (SOGA) y Horacio Oduber Hospital (HOH) y eyden ta specifica e responsabilidad di mantencion. Pero tanten cu e parti di edificio ‘bieu’ di hospital no ta renoba, e mantencion no ta cay pa responsabilidad di SOGA. Y si tur hende a asumi nan responsabilidad, e incidente di awa di diabierna dos siman pasa por a keda evita. Asina e presidente di SOGA John Hodgson a declara den Parlamento diamars merdia. E parti di mantenimiento tabata parti di e serie di pregunta haci pa parlamentarionan na tanto SOGA como HOH. E prome tanda di reunion tabata siman pasa y diamars e di dos tanda a sigui.  MANTENIMIENTO 

E mantenimiento a resulta di ta e factor cu lo a causa e problema di awa dos siman pasa. Ora cu e problema a surgi, a cuminsa un ‘blame game’ (culpamento di otro) entre HOH, SOGA y e compania di construccion. E prome pa sali bin dilanti tabata HOH, sigui pa SOGA y OHL Arellano. E ultimo dosnan a refuta cualkier indicacion di culpabilidad cu nan lo tabatin den nan banda, y a sigura cu ta falta di mantencion di parti di HOH, a pone cu tabatin inundacion di awa den Spoed Eisend Hulp. Esaki pasobra ora cu a bay check kico a pasa, a resulta cu e ‘afvoerwatersisteem’ tabata ‘geplugged’ cu sushi, sea di mata of otro desperdicio. A cuminsa e blame game di ken tabata responsabel pa mantencion di e parti aki. HOH a para ariba cu ta SOGA pasobra nan tabata doño di e edificio desde algun aña atras, ya cu nan a cumpra e edificio. Y cu si un ‘verhuurder’ haci cambio di p.e. e cushina di e huurdo, e verhuurder mester percura pa un solucion, esta den e caso aki SOGA. Un ‘claim’ cu diamars mainta e presidente di sindicato ABV, Gina Maduro tambe a ripiti. Segun Maduro, ta SOGA ta doño di e edificio, y como tal ta esun responsabel pa e mantencion. Awe tardi, Hodgson a bisa otro cos, y a splica cu ta protocol tin firma y cu conforme esey, mester tene nan mes na dje. Noticiacla.com no a mira e protocol pa verifica esaki independientemente.