SOGA mester saca boiler di edificio di HOH sino accion ta sigui

ORANJESTAD – Despues cu nan a reuni un ora cu nan sindicato ABV, un grupo di trahado di Horacio Oduber Hospital (HOH) a bay den accion pa un ora largo. Esaki como protesta di e tantisimo problemanan cu tin den construccion di e proyecto. Despues e presidente di e sindicato, Gina Maduro, a confirma pa noticiacla.com cu e accion ta dirigi contra Stichting Onroerend Goed Aruba (SOGA), cu ta doño di e edificio y encarga cu e construccion y renobacion. Segun Maduro, a manda un carta pa SOGA, dunando nan un siman pa contesta si ta bay kita e boiler cu ta den e edificio. Si den un siman haya contesta cu esaki lo no sosode, nan ta intensifica e accion. “Esaki ta nos unico meta awor di e accion” Maduro a bisa e portal aki despues. 

PROBLEMA CU BOILER

Segun Maduro, e boiler ta un problema cardinal, unda cu na momento cu cende esaki, e ta cuminsa hole diesel, cu ta plama den e edificio y ta haci e trahadonan y e pashentnan malo. Tabata intencion pa saca e boiler algun tempo atras caba pa SOGA, pero esaki nunca no a concretisa. Un di e problemanan segun e sindicato ta, cu e ta costa 800 mil florin pa saca e boiler. E ta un demanda realistico, pero no ta sigur si e ta algo realistico pa saca e boiler den un tempo asina corto. Unico cos cu Maduro kier tende otro siman, ta cu lo saca e boiler. Despues di e ora di accion, e trahadonan a reanuda trabou. A priminti e director cu e operacion di hospital no ta keda perhudica.