Atleta popular Colombiano di Crossfit herida na Aruba a bolbe Colombia

CALI – E deportista Colombiano, Andrés Felipe Henao (Kendo), a yega Colombia bek diadomingo, despues di a sufri un accidente di auto recientemente. E tabata na Aruba pa participa den e competencia di Cross Fit, esta FitVille, pero a keda gravemente accidenta na Aruba. Diasabra ainda noticiacla.com a publica cu e tabatin problema financiero pa por yega su pais bek, debi cu su seguro di biahe no tabata cubri e ambulance flight rekeri pa su transporte. Pero di un forma of otro, a logra colecta placa cu e por a biaha. Awor e tin cu opera, pa asina por recupera completamente di su situacion. E ta un atleta conoci na su pais y ciudad Cali, y e noticia a bira uno publico internacional, ora cu e corantnan Colombiano a raporta e suceso recientemente. Hunto cu Kendo, tabatin e compañero Santiago Tobón cu mester a representa Colombia, den FitVille, cual ta e competencia mas importante di Cross Fit den Caribe. De hecho Tobón tabata e conductor di e auto cu a accidenta. El a sali illeso y su amigo a keda herida. Ta spera cu awor na Colombia, e por haya su atencion medico necesario pa asina recupera satisfactoriamente.