Oduber: Ley di Serlimar posponi pa haya mas tempo pa repasa e documentonan

ORANJESTAD – E reunion cu mester a trata cierto aspecto di Serlimar su cobransa, manera noticiacla.com a raporta caba, ta pasa pa diaranson awor 2 di october 2019.  E motibo duna segun minister encarga cu Serlimar, esta Otmar Oduber, ta pasobra Parlamento mes a pidi mas tempo pa trata e cantidad di contesta riba pregunta cu e mandatario a manda bek. Di otro banda, ta parlamento mes a yama e reunion diabierna ultimo. 

E PREGUNTANAN

Segun Oduber, el a contsta 95% di e 34 pagina di pregunta cu el a haya pa contesta y a manda esaki pa Parlamento. Segun Oduber, debi cu a haya asina hopi material acerca, tabatin mester di mas tempo pa repasa e contestanan. Pa loke ta cierto documento sensitivo manera presupuesto, Oduber a sigura cu Parlamento lo haya esaki como ‘inzage’, pasobra no por parti esaki pa e cay den man di competencia. Segun Oduber no ta husto pa un compania priva haya un presupuesto di un otro compania, pa haya sa con ta gasta y con ta maneha e compania otro. 

BUSINESS PLAN

Un di e criticanan cu tabatin di oposicion ta, cu con un compania por ta maneha, si e no tin un ‘business plan’. Oduber a confirma cu ta trahando riba uno aworaki, pasobra contrario na antes, no tabatin e cuentanan anual actualisa. A actualisa 7 aña di cuenta anual, cu awor por uza pa por traha un ‘business plan’ corecto pa e compania por opera debidamente. Ta trahando aworaki pa keda cla cu e cuenta anual di 2016, 2017 y 2018. 

MOTIBO DI POSPONE REUNION

?Un rumor cu tabata core ta cu a pospone e reunion, mirando e accion di e trahadonan di MetaCorp dialuna mainta, cu a ‘gara’ Parlamento y e compania Serlimar ‘fuera di base’. Como tal lo a pidi dos dia extra pa Serlimar su trahadonan tambe ‘organiza’ un tipo di accion, pero den e caso aki, no como protesta, sino mas bien den forma di sosten pa gobierno, pa por pasa e ley. Oduber sinembargo a refuta e pensamento aki dialuna mainta.