Dialuna anochi ta kita borchi I LOVE ARUBA y aki dos siman ta bay waf

ORANJESTAD – Pa dialuna anochi, personal di DOW lo kita e borchi grandi ‘I LOVE ARUBA’ for di su sitio actual, cu ta dilanti di Bestuurskantoor. Asina director di DOW Marlon Croes a confirma pa prensa dialuna mainta. Den fin di siman noticiacla.com a raporta caba cu lo kita e borchi y re-ubica esaki na Welcome Plaza na entrada di Waf di Playa. Lo no bin nada otro na lugar di e borchi, sino lo ‘prepara’ esaki di tal forma, cu lo no tin nada pa obstrui e bista di Bestuurskantoor mas. De hecho, e motibo pa realoca e borchi, ta conforme regla di ‘monumentenzorg’, cu ta rekeri pa no tin nada pa obstrui un monumento oficialmente registra. Den e caso di Bestuurskantoor, e ta cay bou di e regla aki. 

MAL COMPRONDEMENTO

Tanto minister Otmar Oduber di infrastructura como comerciante Omar-Steve Lejuez, cu ta propietario di e borchi, a desmenti cu lo tabatin desacuerdon manera cu e portal 24ora.com a presenta den fin di siman. Segun Lejuez, ta diabierna a yega na un acuerdo pa un sitio cu nan ta acepta, for di 11 sitio cu gobierno a propone na nan 3 siman pasa, ora cu e negosacionnan a cuminsa. Mientras cu Lejuez no kier a admiti cu tabatin problema, a bisa si cu tabatin negosacion manera tur negosacion, y tabata diabierna cu a dicidi cu ta bay di acuerdo pa e sitio nobo. 

CAMBIO

Pa loke ta e borchi, lo kita esaki pa dialuna anochi mas tarda, despues cu keda cla cu e trabou delanta, y move esaki pa un lugar, unda cu lo prepara esaki pa su lugar nobo. E periodo aki lo por dura mas of menos 2 siman. E area nobo lo keda prepara di tal forma, cu e lo por ubica e borchi den un forma optimal. Entre otro, segun Lejuez, lo adapt’e di tal forma cu por wak e di tur dos banda, cu ta pone cu semper lo tin forma di saca potret di e borchi. E parti bunita cu nan ta wak, ta cu hopi biaha lo por tin un bunita ‘backdrop’ di e bapornan crucero, cu ta mara na waf na Playa. Tambe lo tin luz pa por wak e anochi, klinkers cu ta haci e area mas netchi tambe. “E ta un win-win pa tur hende” Lejuez a finalisa bisando.