Tjin-Asjoe: Aumento salarial automatico ta unico punto pega na ATA ainda

ORANJESTAD – E aumento salarial automatico ta e unico punto, cu ta pega ainda den e negosacion entre Aruba Tourism Authority y Sindicato STA. Por lo menos asina e CEO di ATA, Ronella Tjin Asjoe, a declara na prensa despues di e welga di un ora di 16 (di 22 trahado cu ta cay bou di CAO di sindicato) di diabierna ultimo. Tjin Asjoe a mustra cu nan a kere, cu e partidonan tabata casi na un acuerdo diahuebs, y a gara nan di sorpresa pa e accion di diabierna. Mes momento Tjin Asjoe a bisa cu ta e pleno derecho di trahado pa mustra nan malcontento. 

PROME REACCION

“Nos ta respecta e trahado cu ta demostra nan malcontento” Tjin Asjoe a bisa directamente riba e accion. Di otro banda, e ta bisa cu despues cu e partidonan a sali for di otro diahuebs, el a kere cu tur partido a pusha na algo, cu a kere cu ta cerca di e acuerdo final. Mayoria punto tabatin acuerdo riba nan. “Lamentablemente esey no a resulta di ta e caso”, e CEO a sigui bisa. 

SCUCHA TRAHADO

Tjin Asjoe a bisa cu e ta dispuesto pa scucha e trahadonan (di ATA) tur momento y dialoga riba e pensamentonan. “Esey lo continua” e CEO a sigui bisa. “E portanan ta keda habri”. Mes momento a mustra cu mirando loke a pasa, mesora a organisa un reunion cu tur trahado, pa asina tende nan malcontento. Riba esaki, noticiacla.com a puntra e CEO con a bay cu e reunion aki. “En berdad a tene un reunion habri pa un y tur, esnan cu ta forma parti di e CAO y otro cu no ta forma parti di e CAO” Tjin Asjoe a cuminsa na bisa. Di esunnan cu ta forma parti di d CAO, e personanan cu a opta pa manifesta tambe tabata presente, por lo menos mayoria segun Tjin Asjoe. “Di nos banda, manera a haci na e ocasionnan anterior a splica kico a propone y ricibi como feedback e siman aki, con e reunionnan a transcuri etc. Den presencia di mediador, a discuti diferente pakete. Nos a mustra e empleadonan e contesta di ATA riba propuesta STA 18 di september y nos a mustra proposicion di ATA despues di e reunionnan e siman aki. Tambe a splica kico STA a presenta. El a brinda un y tur un bista completo” Tjin Asjoe a sigui bisa. 

PROPOSICION

E proposicion di ATA a keda rechasa, y e sindicato ta para riba cu e proposicion di 18 di september (150 florin aumento pa tur trahado) mester keda vigente. Tjin Asjoe a bisa noticiacla.com cu u ATA a presenta su programa di evaluacion. E programa di evaluacion ta algo cu tur partido kier mantene. Banda di e programa aki ATA a propone un aumento salarial mara na minimo di tasa di inflacion. Si inflacion ta na X% den aña anterior, ATA lo añadi X florin di aumento mensual den e aña siguiente. Banda di e programa di evaluacion, e montantenan a varia conforme e negociacionnan e siman aki. Segun Tjin Asjoe, lo sigui combersa pa wak, con por yega na un acuerdo ainda.