Campaña fuerte sea pa of contra ley di Serlimar durante weekend

ORANJESTAD – Dialuna mainta 9’or, Parlamento di Aruba ta trata cambio di Ley, pa asina duna Serlimar Sui Generis e posibilidad pa haci cierto cobransa. Tanto gobierno como e compania cu ta sinti nan mes afecta pa e concepto di ley (EcoTech), durante fin di siman a cuminsa un tipo di campaña di conscientisacion, unda cada un ta repasando nan meritonan. Di un banda, gobierno (lesa:minister Otmar Oduber) tabata splica comunidad di e beneficionan cu e ley tin, mientras cu di otro banda, EcoTech a inicia un campaña indicando e consecuencia di e ley pa cu su trahadonan y e clientenan actual. Riba e rednan social por a mira un tipo di mensahe di sosten pa e clientenan di EcoTech, mientras cu Serlimar tambe a cuminsa pasa un video y mensahe cu nan respectivo mensahe. For di ambos skina, por sinti cu dialuna ningun di dos partido lo entrega facil, y lo kier mustra nan ‘presencia’ y ‘determinacion’ pa cu nan futuro.