ATA: Conferencia di Dia Internacional di Turismo 2019 tabata un exito

ORANJESTAD- Segun oficina di turismo di Aruba (ATA) , e conferencia di Dia Internacional di Turismo 2019 tabata un exito. Asina nan ta bisa den un comunicado. Segun ATA, e industria di turismo di Aruba a sigui demostra su liderazgo durante e conferencia di dia Internacional di Turismo 2019, contando cu participacion di mas di 300 invitado cual tabata consisti di entre otro, e mandatarionan, e socionan clave di industria, e studiantenan di Colegio EPI unidad ‘Hospitality & Tourism’ como tambe e studiantenan di e Facultad di ‘Hospitality & Tourism Management’ di Universidad di Aruba, e ekipo di A.T.A. y prensa local.  

CONFERENCIA 

Diabierna mainta e conferencia a tuma luga na Renaissance Convention Center, unda cu Minister di Turismo, sr. Dangui Oduber, a habri e conferencia, expresando su gratitud na tur esunnan laborando den e industria di turismo, cu ta haci nan maximo esfuerso pa laga e bishitantenan sinti nan mes na cas y asina sigui atrae e bishitantenan, pa disfruta di nos bunita destinacion. Alabes, sr. Oduber a elabora riba e importancia di un desaroyo sostenibel pa Aruba. Sr. Oduber a splica cu Aruba ta un isla hopi diversifica cu orientacion internacional, pero uno cu ta trata di mantene y accentua mas su cultura propio, loke nos bishitantenan ta encanta. Ademas, a papia tocante e proyectonan cu ta tumando lugar na San Nicolas, preparando Aruba pa e desaroyonan cu ta biniendo y e oportunidadnan di trabou cu ta bay bin, cual ta relata na e tema internacional, segun United Nations World Tourism Organization pa e Dia Mundial di Turismo 2019, ‘Turismo y Trabou: un miho futuro pa tur!’. 

Durante e conferencia CEO di Oficina di Turismo, señora Ronella Tjin Asjoe-Croes, a toca diferente topico tocante con Aruba Tourism Authority ta trahando, pa Aruba logra yega na un desaroyo duradero. A elabora riba e modelo di desaroyo turistico, cu ta califica como uno di ‘high value, low impact’ y alabes a demostra diferente strategia y documento cu ta cla pa ehecuta, pa Aruba cana e caminda di un desaroyo turistico duradero. Sra. Tjin Asjoe-Croes a sigui elabora riba e resultadonan turistico, y tambe a lansa e iniciativa di ‘Aruba Promise’, aki ta pidi nos bishitantenan yuda nos cuida nos isla y proteha nos recursonan natural entre otro, respetando codigo di conducta cu nos ta spera di nan.  

TURISMO 2019 VERSUS 2018 

Aña 2018 tabata un aña excepcional den termino di entrada genera pa medio di turismo, e asina yama “Tourism Credits”, y a indica cu ta spera cu esaki lo cera 2019 cu un crecemento di entre 4-6%. E Mercado primario Norte America, a conoce un aumento di 7% na 2018 y a sigui ta fuerte den 2019. E region di Latino America, excluyendo Venezuela, tambe a conoce un aumento na 2018 y ta premira cu lo cera cu un aumento den 2019. Tur Mercado Europeo, cu excepcion di Inglatera, cu tabata afecta door di fenomeno di BREXIT, a conoce un aumento na 2018. Ta premira cu e continente lo cera cu un incremento den 2019. Canada tambe a conoce un aumento di 8% na 2018 y ta proyecta di cera 2019 cu un crecemento. Aruba Tourism Authority ta proyecta di cera aña 2019 cu un crecemento di 3.6%, ora tuma e total di tur mercado. Durante e prome ocho lunanan di aña 2019 REVpar (‘revenue per available room’) a conoce un aumento di 8.2%, basa riba entre otro riba un grado di ocupacion di Hotel di 86.6%, esaki ta e tarifa mas halto den region Caribe. Ta proyecta cu lo cera 2019 cu un aumento di e REVpar di entre 5-6%. Na aña 2018 turismo crucero a logra trece 815,161 bishitante na nos isla, cual ta un record nobo. Aña 2019 turismo crucero ta proyecta di cera cu un cantidad similar cu aña 2018. 

E conferencia a conta tambe cu presentacion di orador, Paul Brady, kende ta Editor Strategico di e compania SKIFT. Señor Paul Brady a toca varios tema manera; entre otro e fenomeno di ‘over-tourism y under-tourism’ y e reto cu varios destinacion ta confrontando den e contexto aki, y a mustra varios ehempel durante e presentacion di kico ta haci pa cu esaki.  

Rosabelle Illis, kende tabata maestra di ceremonia pa e magno evento aki, tambe a logra capta atencion di tur esunnan presente. El a trece su mensahe den forma di “storytelling” cu sigur tabata hopi unico y gracioso y a sa di capta atencion di un y tur. E presentacion di Rosabelle sigur a laga hopi hende hari, pero mas cu tur, el a a sa di inculca e compromiso cu nos tur mester tin cu nos isla, pa asina yuda mehora nos calidad di bida, como tambe e calidad di e estadia di nos bishitantenan.

PANEL 

Alabes di duna un presentacion clave na eunnan presente, señor Brady a fungi como moderador di un panel. E panel aki a conisti di studiante di Colegio EPI, Rachel Hennep, studiante di Universidad di Aruba, Laura Molina, gerente general di La Cabana Aruba Beach Resort, señor Joe Najjar y Directora di De Palm Corporation, señora Lisette Malmberg. E panel tabata un panel diverso, unda por a comparti opinion y e pensamentonan riba diferente nivel di nos ciudad. 

TRAINING ‘SERVICE EXCELLENCE IN TOURISM’ 

Parti atardi di e dia aki A.T.A. a tuma e oportunidad di duna un sesion di entrenamento. E sesion a pone enfoke riba e importancia di excelencia di servicio den e industria di turismo. Orador pa e sesion aki tabata señora Claudine Pohl, di ‘Aquila Center for Cruise Excellence’.

BISHITA NA E SCOLNAN MAVO 

Durante e siman di Turismo y e siman cu ta sigui A.T.A. a bishita y lo bishita diferente MAVO rond di nos isla, pa asina logra conscientisa nos studiantenan riba e importancia di Turismo y tambe elabora riba kico A.T.A. su funcion ta y kico ta e trabou cu e ehecutivonan di A.T.A. ta haci diariamente. Tambe ta amplia riba diferente tipo di trabou cu e industria ta ofrece, asina stimulando nos hobennan pa uni nan mes na e industria.