Trahadornan di oficina di turismo di Aruba a bay den accion

ORANJESTAD – Un grupo di trahador di Aruba Tourism Authority (ATA) a pone trabou abou diabierna pa un ora, pa mustra nan mal content pa cu e forma con nan ta wordo trata. Cu e accion ta net riba Dia internacional di turismo, ta un coincidencia, pasobra esaki no tabata planea asina. Ta pasobra un dia prome a haya e reaccion riba e oferta, cu e trahadonan no a acepta. Ta trata particularmente e parti di negosacion di CAO unda cu e directiva di ATA no kier duna aden pa duna e trahadonan un aumento di 150 florin pa luna. Segun e presidente di sindicato STA, Diego de Cuba, si e situacion tabata malo, lo a compronde, pero e situacion ta duna pa un aumento salarial aun mas halto. A critica fuertemente e salario e.o. di e CEO y tambe algun otro persona cu ta den top di ATA. A mustra cu e top tin cu bay, pasobra e no ta traha su trahadonan bon, ta pronkia bunita cu palabra  pafo, perpo paden, den ATA, e trahadonan ta sinti nan mes menosprecia. Ta trata di un grupo di entre 20 pa 22 trahado afilia na e sindicato, di e total di mas of menos 50. Si gerencia y gobierno (lesa: minister Dangui Oduber) no duna oido na nan petiicon, e ora ta intensifica e accion.