Comerciantenan cu sentimento mixto cu decision di gobierno riba BBO

ORANJESTAD – Comerciantenan tin sentimento mixto cu decision di gobierno riba BBO riba recibo. Asina Camara di Comercio a informa diabierna durante nan conferencia di prensa. E decision cu gobierno a tuma encuanto BBO   ta afecta comercio y economia di Aruba. Manera ta conoci, minister a enfatisa cu BBO mester wordo inclui den e prijs y cu e comerciante tin e opcion pa mustra e parti cu ta di e BBO den e prijs riba e recibo.

DESAPUNTA

KvK ta desapunta cu Minister a indica cu gobierno no ta comparti e punto di bista di KvK y no ta sigui e conseho di KvK y comercio. Den un reunion entre KvK y gobierno a splica elaboradamente riba e consecuencia y con e decision aki ta afecta tur e comerciantenan.  KvK ta representa tur negoshinan registra y nan a expresa nan decepcion ora cu a tuma nota di e anuncio di Minister.

TOWNHALL MEETING

KvK a scucha e comerciantenan durante un recien Town Hall Meeting cu a wordo organisa den auditorio na oficina di KvK y a tuma nota di nan preocupacionnan y consehonan. KvK a publica diferente di e puntonan aki den medio di prensa pa mustra kico por considera como alternativa na propuesta di gobierno. Ta lamenta cu gobierno a dicidi contra conseho di KvK y no ta tene cuenta cu e consecuencianan cu KvK a anticipa. E consecuencianan aki ta afecta comercio y comunidad completo y e ta bira responsabilidad di gobierno pa carga. E poder di compra ta wordo afecta y e decision ta un impacto duro pa comercio. KvK ta teme e consecuencia cu esaki tin riba turismo en general.