Minister di Finansa a ricibi Cuenta Anual di Pais Aruba pa 2018

ORANJESTAD - E siman aki Minister di Finansa Xiomara Maduro a ricibi e Cuenta Anual di Pais Aruba pa 2018 for di Director di Departamento di Finansa Derrick Werleman. Asina gobierno di Aruba a informa diabierna mainta den un relato. 

A CUMPLI CU NORMA DI LAFT

Segun e relato, den e Cuenta Anual por mira cu e deficit pa 2018 a keda na 2,1% cual ta 119,4 miyon florin. Cu e resultado aki Gobierno a cumpli cu e norma di deficit pa 2018, den sentido cu a keda bou di e deficit di 2,4% realisa den 2017. Na momento cu a bira bisto cu Aruba, pa motibo fuera di alcanse di e Gobierno nobo, no lo por bay cumpli cu e norma di deficit di 0,5% pa 2018 manera stipula den Ley di LAFT, a keda acorda cu lo keda na un deficit mas abou cu esun di 2017. Gobierno a percura pa baha su deficit y a keda na 2,1% pa 2018, cumpliendo asina cu e acuerdo.

CRECEMENTO DI DEBE TA MENOS

E relato ta sigui bisa cu den 2018 e debe a keda na 4299,3 miyon florin cu ta un subida di 102,1 miyon florin compara cu e 4197,2 miyon florin den 2017. E subida den debe ta conoce un stabilisacion ya cu e debt/gdp den 2018 a keda na 75% compara cu 76,7% den 2017. Un trend cu a sigui tambe den 2019.

ARA Y CAFT MESTER DUNA NAN OPINION

Awor e Cuenta Anual lo wordo manda pa Controlaria General (ARA) pa asina nan por haci nan investigacion. CAFT tambe ta ricibi e Cuenta Anual pa asina duna nan opinion. Asina cu e instancianan aki keda cla, e Cuenta Anual por bay Parlamento di Aruba pa su tratamento y pa stipula e saldo pa 2018.