Laboratorio di Servicio acredita pa Raad voor Accreditatie di Hulanda

ORANJESTAD- Diahuebs 19 september Raad voor Accreditatie (RvA) di Hulanda a informa Laboratorio di Servicio (LDS) cu nan ta ortorga acreditacion basa riba e norma international ISO 15189:2012. Asina e Laboratorio ta bisa den un comunicado. Tin mas laboratorio cu un acreditacion di ISO pero Laboratorio di Servicio ta e promer laboratorio medico na Aruba cu ta ricibi e prestigioso acreditacion aki di RvA, esaki ta un logro grandi y unico. 

Mediante e acreditacion, RvA ta confirma cu e nivel di e diagnostico di Laboratorio di Servicio ta di e mesun nivel cu laboratorionan acredita na Hulanda. RvA pa Ley ta e unico instancia na Hulanda cu mag acredita laboratorionan medico. RvA ta reconoci mundialmente como un lider den calidad.

RvA no solamente ta wak e sistema di calidad den e organisacion pero tambe ta wak ken ta responsabel pa esaki. E presencia di specialista nan di laboratorio manera un klinisch chemicus y arts-microbioloog ta un rekisito pa esaki. Laboratorio di Servicio ta e unico laboratorio acredita na Aruba cu tin e specialista nan aki den servicio y dokternan na Aruba como tambe AZV ta hasi bon uzo di esaki.

“ Durante ultimo añanan, Laboratorio di Servicio a focus hopi riba servicio, calidad, inovacion y eficiencia, esaki conforme nos contracto cu AZV. Ehempelnan ta e diferente prikpost rond Aruba (10 en total), testnan innovativo cu nos so tin (y awor bou acreditacion) y nos sosten na AZV pa usa testnan di laboratorio na un manera eficaz ta algun ehempel di esaki. Asina Laboratorio di Servicio ta contribui na mehora cuido di laboratorio na Aruba”.

“Acreditacion no ta un meta pero calidad ta forma parti di nos manera di traha. Tur aña nos por spera bishita di RvA pa controla si nos ta cumpli cu esaki. Laboratorio di Servicio ta sigui traha riba su sistema pa calidad pa asina otro anja score mas mihor ainda. Tur esaki no ta posibel sin nos personal pa cual Laboratorio di Servicio ta sumamente agradeci”.