Reina Maxima a duna raportahe como e ‘special advocate’ di Nacionnan Uni

NEW YORK - Reina Maxima a duna raportahe di su trabounan como e “special advocate” di Nacionnan Uni. Segun Prome Minister di Aruba Wever Croes, e tabata un evento sumamente ameno y interesante durante e di 74 Reunion General di Nacionnan Uni (‘General Assembly’) na New York, esta e evento organisa pa Reina Maxima, unda cu Reina Maxima a duna un raportahe hopi amplio di su trabounan como e “Special Advocate” di Nacionnan Uni.  

Reina Maxima, 10 aña pasa a apunt’e como “Special Advocate” di Nacionnan Uni cu e mision pa logra inclusion financiero. Su meta ta pa mas y mas hende na mundo tin acceso na e cuentanan bancario. Esaki ta duna e hende e caminda pa independencia. Reina Maxima a presenta un reportahe di su trabounan impresionante den varios parti di mundo. Melinda Gates tambe a conta di su experiencia cu Reina Maxima. 

“Esaki tabata un presentacion hopi impresionante. E trabounan cu Reina Maxima ta desplega ta hopi importante y necesario pa e ser humano haya su luga central den nos mundo”, Prome Minister Evelyn Wever-Croes a duna di conoce.

Riba e potret ta mustra cu Prome Minister tabata sinta banda di su Mahestad, Willem Alexander, kende atentamente tabata atende e presentacion di Reina Maxima. “Un Rey hopi orguyoso di su casa”, Prome Minister a expresa.