Maduro: Gobierno no tabata sa cu CAFt a manda dos carta

ORANJESTAD – Gobierno no tabata na altura cu e Colegio di Supervision Financiero CAFt a manda dos carta, riba e asunto di ‘aanwijzing’. Por lo menos, asina Minister di Finanza, Xiomara Maduro, pa clarifica pa noticiacla.com diahuebs mainta durante un conferencia di prensa. E hecho cu tabatin dos carta, a crea un confusion necesario den comunidad, cu a bay asina leu cu cierto persona tabata yama Prome Minister Wever pa gañado. Esaki pasobra Wever a cita parti di un carta di CAFt cu no a keda publica, creando e impresion, cu e lo a cita un carta robes. Esaki a sosode, pasobra e otro carta publica riba e mesun tema, tabata poco diferente den e contenido. 

CONFUSION

E pregunta exacto na e mandatario, tabata pakico gobierno no a informa for di un comienso cu tabatin dos carta, pa asina evita tur e confusion. Pero eynan a bin compronde di Maduro, cu gobierno mes no tabata na altura cu tabatin dos carta. E ta algo cu ta un ‘novum’ segun Maduro, pasobra esaki no a sosode anteriormente. De hecho, segun Maduro, CAFt no a actua corecto, pasobra CAFt mester a djis manda un carta di anuncio na Parlamento, cu CAFt ta sugeri pa RMR pa bin cu un instruccion (aanwijzing) pa Aruba. Sinembargo, CAFt a opta pa skirbi un carta completo cu splicacion, pero no mencionando ‘e berdad completo’. Como tal, segun Maduro, CAFt a conta e ‘mitar berdad’, creando tur e confusion aki y creando asina division den pueblo.