Crisis Plan Social (SCP) necesario pa combati e retonan social na un manera integral y sostenibel

ORANJESTAD - Crisis Plan Social (SCP) ta necesario pa combati e retonan social na un manera integral y sostenibel. Asina gobierno ta bisa den un comunicado diaranson. Gobierno di Aruba, bou coordinacion di Minister Glenbert Croes, ta bisa di ta trahando incansabelmente pa atende cu e retonan social cu nos famianan ta pasando aden. Por medio di e Crisis Plan Social (SCP) ta trahando cu varios partner riba e tereno social, salubridad publico, husticia y enseñansa. Na augustus ultimo a haci entrega di e di dos raportahe di kwartal di Crisis Plan Social na Gobierno y Parlamento di Aruba. Alabes a haci bishita na diferente ministerio y departamento na Hulanda, pa splica e raportahe di SCP como tambe e desaroyo di tur 31 proyecto cu ta cay bou auspicio di Crisis Plan Social.

E retonan social ta hopi. Gobierno di Aruba pa medio di Crisis Plan Social y cu ayudo tecnico di UNICEF ta atendiendo cu esakinan segun un plan integral, pa asina yega na e solucionnan duradero y sostenibel. Segun dato ta sigui constata e casonan di maltrato, abuso of negligencia di mucha como tambe caso di violencia domestico. Vision di SCP ta pa limita e risiconan cu por tin pa tur mucha, hoben y nan famia. Alabes kier maximalisa tur e factornan di proteccion, pa asina tur mucha y hoben por crece den un ambiente sigur y por desaroya su mes positivamente mas tanto posibel. 

E Crisis Plan Social su obhetivo ta reinforsa e sistema nacional di proteccion di mucha. Den e cuadro aki SCP ta adresa e diferente tiponan di violencia cu ta y por mina e proteccion y siguridad di mucha y hoben na Aruba.

E tiponan di violencia identifica pa UNICEF ta inclui: (1) Maltrato cu por ta fisico, sexual, psicologico/emocional y negligencia di mayornan y adultonan den seno familiar; 

(2) Bullying (tambe cyber-bullying) cu ta causa repetidamente daño fisico, psicologico y social na mucha y hobennan cu ta victima di esaki; 

(3) Violencia bou di hoben cu ta involvi den atake fisico cu of sin arma y violencia di gang; 

(4) Violencia domestico; 

(5) Violencia sexual cual ta inclui rape, acoso sexual, trafico sexual y explotacion sexual on-line; 

(6) Violencia emocional caminda cu un menor ta denigra, ridiculisa, menasa y intimida, y/of su libertad pa move ta restringi y ora mucha y hoben ta testigo di acto di violencia. 

Den e contexto aki, e iniciativanan bou di SCP ta toca diferente sector y area di profesionalismo. E proyectonan bou di SCP ta categorisa den e shete areanan strategico defini pa UNICEF pa contraaresta violencia contra mucha y hoben (grafico 1). 

For di e grafico por mira e sectornan cu cada proyecto ta cay abou.

Desde cu Parlamento di Aruba a aproba e presupuesto na augustus 2018 y e fondonan a bira disponibel november 2018, e 31 proyectonan individual ta encontra nan mes den diferente fase di ehecucion. Por menciona cu tin e proyectonan, cu ya caba a logra nan metanan principal y otro, cu pa diferente factor, nan ehecucion concreto ainda mester inicia. Ta nota cu por lo general e resultado y impacto di varios proyecto den e sectornan di educacion, salubridad y social lo bira evidente a medio y largo plaso. Casi tur proyecto a ricibi caba nan fondo financiero pa ehecucion. Den e raportahe di fin di juli ta duna un bista di con leu cada proyecto a yega na nan meta. Nos por a constata cu 93% di e proyectonan ta den ehecucion completo.

E importancia y urgencia di e proyectonan ta evidente, ora cu para keto na e tema y e desafionan atendi. Por ehempel, optimalisacion di e seccion di hoben den KIA concentrando riba un trayecto efectivo di (re)integracion den sociedad. Ademas, unabes cu nan detencion termina, lo ofrece guia dirigi riba e grupo di referencia pa nan por integra y sigui desaroya den comunidad. Tambe ta facilita un ehecucion adecuado di e ‘leerplicht’ y e stuctura organisatorio pa ehecuta e proyecto di ley di Meldcode. 

Tin proyecto, cu ta yena e buraconan structural den e sistema di cuido y guia. Por ehempel, e proyectonan di FACT-TEAM ta haci posibel, cu pa prome biaha na Aruba, por otorga servicio psikiatrico y di addicion den bario den un fase tempran na e grupo di hobennan concerni. Di otro parti, tin varios proyecto, cu ta haci posibel capacitacion/upgrading di e profesionalnan cu ta traha directamente cu e hobennan cu ta den situacion di peliger y insiguridad. Otro proyecto ta dirigi riba crea acceso directo y expande capacidad institucional pa cuido na un grupo di mucha y hoben vulnerabel den nos comunidad. Esta, esunnan cu tin tanto disabilidad mental como fisico y cu nan red social ta considera no adecuado y/of por forma peliger pa nan siguridad y bienestar. Tin proyecto ta reinforsa e instancianan clave di e sistema di proteccion di mucha, pa elimina e listanan di espera y pa tin e informacion actualisa y e recursonan humano necesario pa por atende efectivamente cu e proteccion di mucha y hoben na Aruba.

Colaboracion entre e sectornan pa den un forma coordina y integral duna servicio ta caracteristica varios proyecto. Asina tin proyecto den ehecucion cu ta dirigi na identifica y sostene famia vulnerabel di studiante, cu via scol ta señala, cu por tin un of otro problema social-emocional cu ta stroba su desaroyo na scol. Un otro proyecto ta, unda lo brinda un loket pa ricibi diferente informacion y acceso na sosten di e diferente instancianan activo riba e area di educacion y lantamento di mucha.

E esfuersonan den cuadro di SCP entre e partnernan den diferente sector ta fungi como un fundeshi solido, pa por promove y garantisa e proteccion y siguridad di tur mucha y hoben na Aruba, p’esey e continuacion di SCP ta di vital importancia pa nos muchanan y nan famia.