Diadomingo awor tin Bike Tour pasando dilanti Hotel y Beachnan

ORANJESTAD --- E hobennan di e team conoci antes como SV Jong Aruba Lifida, lo ta di paranda atrobe cu nan bicicleta, Diadomingo awor 30 di November 2014 riba cayanan di area di Noord. Awor nan ta conoci como Sport Club United, e Bike-Tour aki lo sali Diadomingo pa 9’or di mainta, y ta programa pa finaliza alrededor di 12’or di merdia. Participacion ta unicamente 10 Florin, y cu esaki e organizadornan lo suministra awa pa bebe, boli, y tambe fruta. E Bike Tour lo sali for di nan veld na Boegoeroei, cu ta keda como 400 meter pariba di Misa di Noord.  Aki di e “Brug di Madushi”, nan lo sali direccion pabao, y banda di Misa di Noord nan lo bay direccion zuid, esta pa Shaba. Na altura di Do-It Center, ta bira direccion pabao, pasando Bubali y yega te na Eagle Beach, unda panort di Amsterdam Manor ta bira bay direccion Highrise Hotelnan. Asina lo pasa dilanti Hotelnan, y ora di yega Palm Beach Plaza, lo bira direccion man robez, y yega te na Arashi.  Aki lo tuma un break. Posteriormente lo regresa pa Malmok, unda ta bay tuma Malmokweg, pa pasa dilanti Tierra del Sol, sigui pa Westpunt, Saliña Cerca, Turibana, y yega bek Misa di Noord, unda lo bira man robez pa regresa veld.  Por fabor sea na ora pa asina e sali na tempo.