ATA ta organisa e sesionnan cu enfoke riba entrenamento dirigi riba nivel di servicio

ORANJESTAD – Celebracion di Dia Mundial di Turismo ta un ocasion den cual Oficina di Turismo ta tuma e oportunidad pa, no solamente conscientisa comunidad riba e importancia di e industria pa nos pais y celebra tur e individuonan cu nan trabou diario ta carga esaki, pero tambe pa comparti conocemento cu ta habilita tur partido envolvi pa alcansa e obhetivonan di duna un miho servicio. Dia Mundial di Turismo ta celebra riba 27 di september y en conexion cu esaki, A.T.A. ta organisa su conferencia anual cu presencia di e studiantenan di Universidad di Aruba y Colegio E.P.I. Ademas, A.T.A lo bishita diferente scol MAVO, pa asina conscientisa nos studiantenan di kico ta turismo, dicon esaki ta importante, ken A.T.A. ta y kico ta e trabounan cu A.T.A. (entre otro) ta haci diariamente. Tambe lo tene su sesion di entrenamento, pa sigui mehora e servicio den turismo. 

Durante e sesion di merdia, Claudine Pohl di ‘Aquila Center for Cruise Excellence’, lo pone enfoke riba e importancia di excelencia di servicio den e industria di turismo. 

E obhetivo principal di e atardi ta pa comparti informacion valioso cu esunnan cu ta envolvi directamente aki na Aruba den e industria di turismo. Esey ta inclui entre otro tour operators, esunnan cu ta traha na inmigracion, cuerpo di polis, e taxistanan, Arubus, Aruparking, Arutram, pero tambe esunnan cu ta brinda servicio di e actividadnan.