AZV: Tin proveedor nobo pa e materialnan di incontinencia

ORANJESTAD - Despues di un destaho publico y cumpliendo cu tur rekisito pa cu esaki, Organo Ehecutivo AZV a cera contracto cu un proveedor nobo pa e materialnan di incontinencia. Asina nan ta raporta den un comunicado.  

Pa loke ta e poveedor nobo, consecuentemente, esaki ta nifica cu entrante 1 di october 2019, Martijn Trading N.V. lo ta encarga cu e entregamento di e materialnan di incontinencia na alrededor di 2000 asegurado di AZV, cu ta bin na remarca pa esaki. 

E ta di suma importancia pa e usuarionan di material di incontinencia tuma nota cu e servicio (y traspaso) ta bay automatico. Martijn Trading N.V. a ricibi un lista di e usuarionan. Entrante 1 di october 2019 y despues, Martijn Trading N.V.  lo percura pa hiba e productonan te na cas di e usuarionan. 

Despues di prome entregamento di material na e usuario, e usuario mes por scog’e kico e ta prefera, esta: a) keda cu e servicio di Martijn Trading pa hiba e materialnan te na cas of: b) pasa busca e materialnan cerca Martijn Trading N.V. (entrada VIVA Medicare).