Colegio San Antonio porfin riba lista pa wordo renoba

ORANJESTAD – Colegio San Antonio ta riba lista pa wordo renoba. Gobierno kier inverti 100 miyon mas den enseñansa, particularmente cu e meta pa renoba scolnan. E lista ta cla, aunke no a divulga cua scol ta riba e lista. E mandatario di enseñansa Michelle Hooyboer Winklaar a mustra cu e intencion ta pa manda e lista awor pa Conseho di Minister pa aprobacion riba e opcionnan disponibel. Mes momento por a nota cu porfin e scol cu tabata den noticia recientemente (Colegio San Antonio) a aparece riba e lisa di scolnan cu lo wordo renoba. Un anuncio pa destaho (mira e destaho aki) a aparece y esaki a alegra esnan di e scol hopi. “Porin nos ta na turno” algun a expresa riba e.o. facebook.

E mandatario a mustra cu tin hopi scol cu mester un renobacion, sea grandi of chikito pero e fondonan disponibel no ta alcansa pa por cumpli cu tur. E mandatario encarga a sigura cu hunto cu expertonan a analisa cada caso di tur e scolnan y asina a yega na un miho plachi di e situacion actual, e necesidadnan y e presupuesto mara na e plan di renobacion aki. A evalua cada scol riba nan prioridad y awor e parti aki ta cla y tin un miho bista riba kico lo costa pa renoba of haci trabounan riba infrastructura di nos scolnan. E foto ta uno di archivo di algun tempo pasa ora cu e alumnonan a dicidi di bay den accion pa motibo cu no tabata haya oido riba e trabounan di renobacion. Resultado mesora tabata accion di gobierno, cu a pone cu e situacion a mehora na e lugar temporal na Dakota.