Personal di cushina di Renaissance Conference Center afecta pa huida di gas

ORANJESTAD – Decenas di trahado den Renaissance Conference Center a bira malo diamars mainta, a consecuencia di un supuesto gas lekkage (huida di gas). Segun vocero di bomber Ferdidand Ponson, den careda di 9:20 am, central a haña melding pa bay ‘ter plaatse’ pa hendenan cu ta birando malo den cushina. Segun Ponson, brandweer a yega y a constata cu tabata un gas lekage. Esnan cu a bira malo tabatin wowo y garganta irita y tabata sinti mareo. Ta a base di e situacion ey, cu ambulance a opta pa yama bomber. Un total di 27 trahado lo tabata  na trabou e momento ey. Di esnan malo, 4 a keda transporta pa hospital pa mas tratamento y e otronan a bay cas pa por a ‘bin bey’. Despues di e midimentonan inicial, a bin constata posiblemente un combinacion di gas LPG y monoxido di carbon. Un di e klep cu mester a chupa e huma di lugar afo, no tabata traha, y esey a pone cu posiblemente e problema a surgi.