Wever: CAFT a propone na RMR pa duna Aruba un aanwijzing!

ORANJESTAD – Colege Aruba Financieel Toezicht a propone na conseho di minister di Reino (RMR) pa duna Aruba un aanwijzing. Gobierno di Aruba mes a confirma esaki diamars pa medio di un comunicado di prome minister Evelyn Wever. Pa loke ta e aanwijzing, noticiacla.com tin informacion cu esaki ta pa dia 18 di October 2019. Pa loke ta e carta, gobierno a informa cu CAFT diamars ultimo a manda e carta pa Conseho di Minister di Reino relaciona cu e posicion financiero di Aruba.

CUMPLI CU NORMA PERO.. 

“CAFT ta indica cu Aruba ta cumpliendo cu e normanan actual pa 2019. Sinembargo CAFT ta preocupa pa e termino largo. Y pa esey ta propone na Conseho di Minister di Reino pa un aanwijzing pa Aruba”. Wever a bisa den e comunicado. CAFT ta basa esaki riba 3 punto. CAFT kier sa exactamente con e Reforma Fiscal lo bira, siendo cu esey ta algo cu na e momento aki Gobierno di Aruba no sa ainda pasobra mester sigui dialoga cu gremionan.Tambe CAFT ta preocupa pa e gastonan di personal, un preocupacion cu Gobierno di Aruba ta comparti. Sinembargo e crisis na Venezuela por ehempel, ta trece cu ne mas gasto di personal pa atende cu frontera y migracion. Gobierno di Aruba ta sigui traha riba esaki. Y finalmente CAFT ta preocupa cu e Crisis Plan Social. CAFT no kier pa e fondo keda separa, pero kier pa e wordo incorpora den e presupuesto.

SOCIAL CRISIS PLAN

Segun Wever gobierno y Parlamento di Aruba a institui un fondo separa cu ta temporal pa por atende cu e explosion social den nos comunidad. E decision pa pone den un fondo separa ta pa asina duna Minister di Asuntonan Social espacio pa atende cu e explosion social cu e gobierno anterior a causa, mientras cu Minister di Finansas ta deal cu e crisis financiero cu tambe e gobierno anterior a laga. Minister di asuntonan social, Minister di husticia, Minister di enseñansa y Minister di salubridad tin varios proyecto hopi importante pa ehecuta e plan aki. E mision di Gabinete Wever-Croes ta pone e ser humano central y p’esey e crisis plan social tey. Minister President a informa Secretario di Estado Knops di esaki caba na juli di e aña aki pero no a haya contesta.

PREOCUPA PA FUTURO

“Mi no ta preocupa tanto pa esaki pasobra riba e parti principal, cu nos ta cumpliendo cu palabracion, no tin discusion. CAFT ta preocupa pa futuro, y ami tambe ta preocupa. Nos ta trahando riba esey ainda, pero esey no ta motibo pa awor nos cambia e presupuesto 2019 manera CAFT ta pidi. Nos ta sigui den dialogo cu Hulanda riba esaki, mientras cu aki na Aruba nos ta trahando riba cera e ‘gap’ financiero pa presupuesto 2020, cu alternativa sin crea un peso mas grandi riba comunidad. Mi ta mas preocupa pa esaki, y mi ta bay dedica tur mi atencion na esaki awor”, Prome Minister Evelyn Wever-Croes a duna di conoce.