Discusion entre dos comerciante na Barcadera pa tereno cu lo a bira ‘dump’

BARCADERA – Un disputa entre dos comerciante conoci diamars a yega un climax diamars mainta na Barcadera, ora cu departamentonan di gobierno a cay aden. Ta trata di dos tereno na Barcadera, pega na e waf di Barcadera, cu ta di Aruba Ports Authority NV pero cu ta den uso door di dos diferente comerciante. E disputa ta entre e comerciante Ven Eman y Jamal Mahawat Khan, unda cu ambos ta mustra cu nan tin derecho riba e tereno y ta critica otro pa nan forma di opera unda cu uno ta considera cu e area a bira un otro dump illegal. Na e sitio, un discussion entre e yiu di Ven Eman, esta Trevor Eman y Khan a hera bay for di man, ora cu nan dos a cuminsa discuti cu otro. E tata Eman a hala e yiu for di e sitio pa trankilisa e situacion. 

EMAN

Comerciante,Ven Eman di Kooltemp a splica noticiacla.com cu e ta pagando huur pa su pida tereno, y cu e tin su documentonan na DIP pa por bira doño di e tereno. Segun Eman, Khan a pidie pa usa su tereno pa un periodo, y no tabatin obhecion. Pero Eman no por a kere loke cu Khan a haci cu e tereno cu e (Eman) a laga drecha y desaroya den un forma mas usable. Segun Eman, e loke cu Khan a haci, ta contra palabracion y cu loke mester a bira 2 siman di uso di tereno, a bira algun aña. Y awor, e sitio a bira manera un dump, unda cu tin cero halto di material deposita pa entre otro EcoTech y Ecogas. Y e buchi di Eman a yena, y a dicidi di blokea e entrada pa Khan, pero segun Eman, Khan a kibra e cadena y tubonan y haya aceso bek riba e tereno. Durante e combersacion, personal di Directie Infrastructuur en Planning a confirma na noticiacla.com cu Khan no tin un permiso di APA pa ta ey, y loke e tin ta un documento cu un peticion. 

KHAN

E comerciante Khan ta sigura noticiacla.com cu mientras cu enberdad e tereno ta di APA, e tin un permiso verbal cu APA, pa tin su operacion eynan. Segun Khan, e ta un asunto politico ya cu Eman, ruman di ex premier Mike Eman, no a regla su asuntonan bon e tempo ey y awor ta bin haci fastioso. Segun Khan, e ta haya e trato aki pasobra contrario na otro comerciantenan, e no ta dispuesto pa lembe tras di gobernantenan y paga nan placa bou di mesa pa haya algo regla. Khan, ta usa parti di e tereno pa su negoshi cu ta di recicla resto di sushi duro manera bleki, glas, y otro obhetonan duro. E intencion di Khan ta(bata) pa exporta esaki pa paisnan manera India. Pero segun Khan, e situacion actual ta cu no por a haya un forma di transporta e sushi aki di un forma responsabel, debi cu e sushi cu ta bin eynan, no ta ‘separa’ manera cu mester, pues tin mas cu djis bleki, glas y plastic. Y asina e no por wordo procesa y manda den exterior pasobra e ora e ta haya problema cu e paisnan cu ta ricibi e productonan aki, y cu douane di e pais ey pa motibo di e contenido. Segun Khan, e ta andando cu e asunto aki 2 aña caba, y tin un bon entendimento cu APA pa cu su parti di operacion.