OHL Arellano: “Tur acusacion di HOH contra nos ta falso!”

ORANJESTAD – Completamente falso, ta loke cu e gerente di compania di construccion responsabel pa e construccion y ampliacion di Horacio Oduber Hospital(HOH), Jeffrey Shahiin di OHL Arellano, a bisa dialuna atardi. Apenas 2 ora despues cu e fundacion responsabel pa e construccion (SOGA) a purba desbarata e acusacionnan di HOH, Shahiin (OHL Arellano) a haci mescos, cu no a sorprende niun hende. “SOGA a haci un tremendo trabou den nan conferencia di prensa”, Sahiin a bisa, refiriendo na e reclamo di SOGA contra HOH pa acusacionan no corecto. Tur e acusacionan, for di e echo cu e compania no tin experencia den construi hospital, te na e gastonan extra y tardansa di e proyecto. Un pa un, Shahiin a purba desbarata. E ‘score’ awor ta 2 contra uno, esta SOGA y Arellano contra HOH. Ainda falta gobierno pa reacciona. 

E FAYO DI AWA

Pa loke ta e fayo di awa, Shahiin a basicamente ripiti e splicacion di SOGA, esta cu ta falta di mantenimento di HOH mes, a causa cu tabatin problema cu awa. E sistema di ‘afvoer’ pega cu sushi, tabata e motibo cu e tubonan no a wanta e peso y a kibra, cu consecuencia cu Eerste Hulp a inunda diabierna marduga. “Falta di mantencion di HOH ta e motibo pa esaki,” Shahiin a sigui bisa. 

GAÑAMENTO

Segun Sahiin, nan tin un contracto cu SOGA y ta traha cu SOGA for di 2014 cu nan a haya e trabou. A sigura cu nan ta trahando solamente cu e companianan Arubiano y trahado Arubiano, cu excepcion di un solo subcontratista, pero cu e ta empleando solamente local. “Atake riba nos trabou ta un atake directo riba e companianan y e trahadonan local, cu a haci un bon trabou di construccion” e gerente a sigui bisa. Nunca nan a haya e necesidad di contraaresta e declaracionnan, pasobra nan no ta mete den politica di e pais. Pero e biaha aki nan a haya ta necesario pa defende nan nomber. “Nos tin experiencia amplio den construccion di hospital y salud publico” Shahiin a sigui bisa, den intento pa desbarata, cu nan no tin experiencia den esey. Tambe tardansa di e proyecto no ta debi na nan, sino e constante cambionan cu HOH a bin cu ne, di cual nan a cumpli, pero cu ta causa e tardansa. Y pa loke ta e gastonan extra, esaki no ta tarea di e compania Arellano, sino SOGA. Pues no por culpa Arellano si e gastonan aumenta. Reclamo riba uzo di material inferior tambe a haya critica. “Tur material ta segun contract y aproba pa SOGA y gobierno” Shahiin a sigui bisa. Pues no por claim nada cerca e compania di construccion. “Nos a traha segun specificacion, y tur material ta inspecciona”. “Nos a construi y entrega tur trabou y no a haya ningun keho di SOGA”, Shahiin a sigui bisa. Pa loke ta e falta di mantenimento y otro keho, no ta cay den margen di nan trabou y responsabilidad, e gerente di e compania a sigui bisa.