SOGA: Falta di mantencion di hospital mes a causa problema di awa

ORANJESTAD – Sticting Onroerend Goed Aruba (SOGA) a culpa hospital Horacio Oduber su falta di mantencion, pa e problema di inundacion di awa cu a surgi den fin di siman. Dialuna SOGA a kibra silencio durante un conferencia di prensa, pa contraaresta e declaracionnan di HOH riba e proyecto di expansion y renobacion di HOH, ‘cu no ta cuadra cu realidad’. Cu rapport den man di e resultado di investigacion, tanto John Hodgson (presidente di SOGA) como project leader pa SOGA, Michael Habibe y director di AIB, Frendsel Giel, a splica cu no ta falta di SOGA kico a sosode, pero cu nan ta yuda remedia e situacion si. 

KICO A PASA

Segun Habibe, a informa SOGA marduga di diabierna, cu tabatin ‘un incidente di awa cu a drenta via e dak di Eerste Hulp’. A constata cu e ‘fitting’ di un pipa di ‘afvoer’ di e awacero a los’. Despues a resulta cu e fitting a bula. Ora cu a bay averigua kico por a pone e fitting bula, a resulta cu ‘e awacero no tabata bay pasa door, ya cu e pipanan pafo na final, cu mester hiba e awa te na Bubali Plas, tabata blokea door di crecemento di yerba y te hasta door di debris’. Mes momento a mustra cu HOH mester drecha e ultimo parti, pasobra ‘e mantencion di e area aki ta cay bou di responsabilidad di hospital mes y no di SOGA’. Pues a culpa HOH di e problema. Segun SOGA, hospital mes a admiti ‘di tin varios tempo cu no a haci e mantencion necesario y cu lo laga haci esaki mas pronto posibel’. Segun SOGA, pa diabierna atardi hospital a laga un contratista haci e limpiesa necesario pa nan. “SOGA na su turno a start toch un investigacion independiente y completamente riba e lekkage aki’. A entrega e edificio 2 aña pasa y tabata den funcion for di e tempo ey. Durante e 2 añanan ey, aki a yobe duro, sin problema eynan. Diadomingo atrobe tabatin problema di awa na hospital, causa un biaha mas door di keda sin haci e mantencionnan necesario na e rioolputten di e MOB (edificio nobo), cu tambe tabata geplugged. Pues atrobe, culpa di hospital. SOGA durante e conferencia, a bisa cu tabata necesario pa clarifica un ke otro, pasobra e contratista y SOGA tabata haya critica, sin cu tabata nan falta y cu esaki no tabata corecto. Nan kier sigui traha y ta spera cu comunicacion ta bon cu hospital, pa esaki no sosode mas.