Tormenta tropical # 12 Lorenzo a nace un dia despues di Karen

MIAMI – Cu nacemento di Tormenta Tropical Lorenzo dialuna mainta, e temporada di horcan pa 2019 definitivamente ta mas activo cu inicialmente a pronostica. Ya caba nos a yega na e di 12 tormenta cu nomber, di e 21 nombernan cu tin disponibel e aña aki. Y si tene na cuenta cu e prome pronostico di april 2019 tabata menciona 13 tormenta, esaki kier men cu el a yega e cantidad caba. Di otro banda, a actualisa e pronostico na augustus 2019 y a aumenta e cantidad di tormenta te na 15 tormenta. E cantidad di horcan a aumenta tambe di 5 pa 8. Y tene na cuenta cu ainda falta 2 luna activo, di cual October tambe ta basta activo norlmalmente. Notable ta e rapidez cu cual e tormentanan ta nace. Diadomingo tormenta Karen a nace, y ya dialuna Lorenzo ta mira ‘luz di dia’. Ningun di nan ta afecta nos islanan directamente, pero indirectamente ta kita e bienta y ta laga nos den un calor insoportable.