Casibari Jazz Festival 2019 a luci cu e localidad y artistanan di taya

ORANJESTAD – E prome edicion di Casibari Jazz Festival 2019 ta tras di lomba y organizadornan por wak bek riba un evento exitoso, basa riba varios punto. E localidad nobo, e formato di concierto, e artistanan y mas. Despues cu e formato ‘original’ a keda cancela ora cu e patrocinante principal ATA Sui Generis a hala su patrocinio atras, e organizadornan a dicidi pa sigui toch cu e festival, den un formato mas chikito y un otro localidad. Y di e comentarionan ricibi, nan por ta trankil cu e tabata un exito sigur.

E LOCALIDAD

E localidad no ta desconoci pa tipo di conciertonan chikito di Jazz, pues esey tabata un escoho logico. Logisticamente sinembargo, e por tabata un reto pa logra haya un grupo mas grandi (500+) di hende, sin cu e ta crea un chaos organizatorio, cuminsando cu e situacion di parkeo. Usando e parkeerplaats di misa di Paradera, a percura pa shuttle busnan constante entre e sitio y e lugar di concierto. Esaki a resulta perfecto, unda cu e busnan tabata warda nan pasaheronan y cada 15 minuut tabata transporta nan sea pa e sitio di concierto, of bek pa nan auto. E transporte a resulta fabuloso unda cu e shuttle tabata lagabo te dilanti e ‘porta di concierto’. E localidad mes a keda transforma den un tipo di Jazz Village, dorna cu luz, booth pa arts and crafts, cuminda y bebida, dunando e lugar un aspecto ‘cozy’ y diferente. Comentarionan positivo so por a tende di e parti ey. Hasta tabatin suficiente booth pa cumpra tokens, bañonan portatil bon atendi pa personal di limpiesa, y suficiente cuminda y coi bebe. Na tur, comentarionan tabata hopi positivo. 

E LINE UP

E line up a percura pa un fluho constante y amante sigur di e musica di Jazz y tambe poco latino y local. Tabatin algo pa tur hende, y esey a pone cu a mira un mix di publico bunita. Hopi local, hopi Hulandes, y hopi prensa cu a cubri e evento aki. E artistanan mes, tambe tabata di taya internacional. For di e localnan Oruba, Micheal Bremo Quintet y Robert J’eandor, te na e internacionalnan, Count Tutu, Antonio Bello cu a bolbe di Spaña, Tony Succar y for di Corsou, Randal Corsen, Tania Kross y Dibo D. Cada uno a duna tur cu tin deleitando esnan presente y lagando un bon impression musical atras. Atrobe, organizadornan di e festival por wak bek riba un fin di siman exitoso tras di lomba, y por ta sigur cu e lugar aki lo por facilmente keda e lugar pa e festival aki tuma lugar, den e formato cu a keda presenta e fin di siman aki. Potretnan ta di Noticiacla.com, incluyendo drone shots.