Premier Wever no ta na altura di deadline di 18 di October di Knops

ORANJESTAD – “Ami no sa nada di un deadline di 18 di october, mi a tende esey den prensa, pero mi mes no a haya nada oficial di Hulanda riba esey y esey no a wordo palabra tampoco den Rijks Ministerraad. Pues mi no ta tuma algo asina na serio tampoco”. Esey tabata reaccion di prome minister Evelyn Wever Croes diadomingo riba declaracion di secretario di estado Hulandes Raymond Knops di diabierna. Eynan Knops, contrario na Wever su declaracion algun ora prome, a bisa cu debidamente Aruba a haya un deadline nobo diu 18 di October pa cu e ley diu LAFt. Segun Wever pues, tanten cu e no haya e informacion official, e lo no ta berdad. Knops a haci e declaracion di e deadline durante un entrevista cu e periodista di Caribisch Netwerk, John Samson. Tur media local a reproduci esaki, ya cu e ta interesante cu dos mandatario ta haci dos declaracion contrario. 

SOLUCION

E declaracion menciona di Wever ta e unico cu el a haci directamente riba esun di Knops. Premier Evelyn Wever-Croes: “Maske cu esaki no kiermen cu tur problema ta soluciona, mi ta hopi satisfecho cu nos no a haya un KB, y cu nos a haya mas tempo y espacio” Wever a sigui bisa, refiriendo na e hecho cu Hulanda a opta pa no ‘multa’ Aruba e biaha aki pero dune mas tempo. Mas tempo, pero mara na e fecha di 18 di October, riba cual segun Knops, Aruba mester duna Hulanda mas claridad. Wever no a aprecia e forma di comunica di e mandatario, bisando cu “dia Hulanda cuminsa comunica cu Aruba dia cierto prensa, nos ta hopi leew for di cas” . “Awe ta un dia grandi pa Aruba, pasobra en bes di a haya e KB cu nos oponentenan a desea pa Aruba haya, nos a haya tempo y espacio mustrando asina cu poco poco pero sigur tin mas confiansa den Aruba”, Wever a bisa, reaccionando riba e ponencianan di partidonan opositorio, cu un dia prome a yama e situacion actual como un ‘crisis constitucional’, esta e hecho cu gobierno ta bay contra un ley cu parlamento a aproba.