Knops: Aruba tin 4 siman pa trece claridad riba futuro di LAFt

DEN HAAG/ORANJESTAD – Conseho di minister di Reino (RMR) kier claridad riba e situacion financiero y e asunto di LAFT pa mas tarda nan proximo reunion cu ta dia 18 di October 2019. Asina secretario di estado Hulandes Raymond Knops a declara na Caribisch Netwerk diabierna mainta laat. Prome minister di Aruba Evelyn Wever sinembargo ta bisa otro. Segun Wever den su declaracion na noticiacla.com diabierna mainta den su conferencia di prensa, berdad a haya mas tempo, pero no a mare na un fecha cu cual tin presion pa tin claridad, y cu e ta kita for di agenda di RMR. E ta bisa si mesora, cu e mes no tabata na e reunion, pues no tin tur detayes y ta basa su mes riba informacion di e minister plenipotenciario Guilfred Besaril. Pues aki e detaye por ta diferente. 

WEVERProme minister Wever a sigui bisa e portal aki cu Aruba ta mas tempo awor y trankilidad pa sigui traha cu CAFT y LAFt (e version bieu), ‘mientras cu ta prepara organo di supervision independiente’. Segun Wever, informacion cu e tin, ta cu no a palabra ningun fecha nobo sino cu lo sigui trata e asunto riba nivel di ambtenaar, y cu a kita e ley for di mesa (agenda di RMR) door di no ratifica e ley cu cambio di LAft. Segun Wever a haci esaki pa kita e presion di Hulanda, pa asina tene nan (Hulanda) trankil. Y di banda di Hulanda,- por lo menos segun Wever -, no a pone ningun condicion, ningun fecha pa keda cla. Hulanda sinembargo ta bisa otro y esey ta haci e caso ‘confuso’, pa no bisa ‘interesante’. Esaki pasobra  mientras cu Wever ta bisa cu no tin mas fecha, y cu e ta bari for di agenda di RMR, Knops ta bisa claramento cu nan (RMR)  kier claridad di e asunto aki pa e proximo reunion, cu ta aki 4 siman. 

PALABRACION

Segun Knops, contrario na Aruba cu por ta ta ‘contento’ cu nan a bolbe scapa di un KB y a haya mas tempo pa drecha nan situaicon, Hulanda no ta contento cu e logro di diabierna. Riba e pregunta di CN cu si Hulanda tambe ta content cu e ‘logro’, Knops a bisa cu esey no ta e palabra corecto. “Mi ta hopi malcontento cu e situacion manera cu e ta ainda (na Aruba), unda cu Parlamento di Aruba a cambia e ley di LAFt pa saca e control di CAFT afor. Mi tabata hopi disgusta cu esey, y esey mi ta ainda” Knops a sigui bisa. Di otro banda e ta haye un bon prome paso di gobierno (di Aruba) den e bon direccion, door di no ratifica e ley en cuestion (di LAFt). Segun Knops, nan (Hulanda) ta mas trankil berdad cu e ley no a wordo ratifica, pero nan tin ainda e presion cu e ley ta riba mesa y cu cualkier momento Aruba por dicidi di ‘ratifica’ e ley. Segun Knops, Hulanda kier pa Aruba simplemente kita e ley for di mesa. Pues aki claramente tin un falta di comunicacion of clarificacion entre Hulanda y Aruba, pasobra segun Wever, e ley a wordo kita for di mesa. Un punto positivo segun Knops, ta cu Aruba no a viola e palabracion di protocol. Hulanda ta wardando e cifranan annual (jaarrekening di 2019) pa wak si e resultadonan ta manera a keda palabra segun protocol. “Ta mucho tempran si pa (Aruba) bisa cu enberdad ta bay logra esaki. Esey lo ta mucho optimista” Knops a bisa. “E situacion financiero ta keda preocupante. Cu e debe nacional a baha debi na un metodo diferente di calculacion y e crecemento di PPP, esey ta berdad. Pero e motibo principal (di e debe) ta cu ta wordo gasta mucho hopi y esey mester wordo coregi”. Y segun Knops, pesey tin palabracion pa cumpli cu ne pa logra nan meta. 

LEY

Un otro punto cu ta contradictorio, of por lo menos tin dos version ta core, ta e hecho cu Aruba ta bisa cu ta bay basa su mes riba e protocol, y cu no ta bin cambio di ley mas. E ley di LAFt su base bieu ta keda, esta ta dileña e autoridad cu CAft tin pa actua, pero cu pa loke ta e normanan, lo usa e protocol. Pues no ta necesario mas pa pasa un ley nobo, manera cu por a compronde di premier Wever. Hulanda ta opina otro. Segun Knops a sigui bisa CN awe mainta, berdad cu tin un protocol, pero e no tin un base legal, ancra den un ley. “Esey mester a sosode. Esey Parlamento (di Aruba) no a haci, y cu esey, nan (Aruba) ta core e risico di por wordo ‘degrada’ of ta colga un percentahe halto di interes riba cabez di Aruba”. Tin berdad varios posibilidad pa resolve e asunto, pero esey ta keda na Aruba mes segun Knops. “Pero en todo caso, e mester ta ancra pa ley. Y pa esey, nos a duna nan mas tempo” Knops a bisa. “Pero pa bisa cu nos ta contento (cu e resultado di diabierna), no, mi no ta contento en absoluto”. Y e parti final, Knops ta confirma, contrario na declaracion di Wever, cu a palabra cu prome cu e proximo RMR di 18, Hulanda kier aclariacion. Algo cu pues Wever ta bisa, cu no ta e caso, esta cu no tin un fecha. Scucha e grabacionan di entrevista entre Caribisch Netwerk y Knops AKI.  

Fuente: Caribisch Netwerk.