Gobierno a menasa SOGA di lo no paga pa renobacion/expansion di HOH

ORANJESTAD – Gobierno den un carta fuerte diabierna manda pa fundacion encarga cu e proyecto di renobacion y expansion di Horacio Oduber Hospital, esta SOGA (Stichting Onroerend Goed Aruba), a menasa di lo no cumpli cu nan obligacion di paga pa e proyecto y tuma medida legal contra e fundacion en cuestion, pa motibo di e fayonan cometi constantemente. E mas recien tabata e inundacion den e parti di S.E.H, esta e parti di Eerste Hulp (Spoed Eisend Hulp) despues di un palo di awacer diabierna marduga. E imagennan ta mustra tur cos, menos un proyecto cu ta bal casi un biyon florin. 

E CARTA?

Den e carta, e mandatario responsabel pa salud, Dangui Oduber, ta mustra cu no falta pa bisa cu e trabounan a bay tur cos menos soepel, y cu tin demasiado ehempel pa prueba esaki. “Esaki tabatin sinembargo consecuencia grandi pa e trahadonan na HOH, pashent y salud publico” Oduber ta bisa. E ta referi tambe na un reunion cu caracter di urgencia riba peticion di mediador, relaciona cu e kehonan di e sindicato ABV relaciona na e molester di cierto trabou haci. Mientras cu e partidonan a keda ‘trankilisa durante e reunion, awe mainta tabatin e inundacion segun Oduber, cu ta mas sigur debi na e calidad di e trabou. “Esaki a causa daño na material di Hospital y tin tambe consecuencia negativo pa e cuido medico. Bo(so) lo compronde cu e buchi a yena pa tur partido en cuestion, y cu e cambionan drastico mester tuma lugar a termino corto, pa evita e tipo di incidentenan asina. E bienestar di e trahadonan, bishitante y sigur e pashentnan ta di interes primordial”, Oduber a sigui bisa. 

NO TA PAGA 

“Gobierno tin cu bay paga pa hopi aña largo, pa un proyecto cu tin hopi pregunta y duda, pa loke ta encera e calidad di trabou”, Oduber a sigui bisa. Basa riba tur esaki, Oduber a finalisa e carta, menasando cu gobierno ta evaluando, pa no cumpli cu su responsabilidad (financiero) y pa tuma medida legal den interes di salud publico. Lesa e carta AKI.