- Gotopo: Prolongacion di cierre frontera cu Venezuela ta un medida absurdo
- Ultimatum pa dicidi riba suma cu radionan mester paga DUCAPRO tur luna, a vence sin resultado
- Inflacion ta mas abou na Boneiru, mas halto na Sint Eustatius y Saba
- Gobierno Hulandes ta evaluando pa stop su paginanan riba Facebook
- Travel& Leisure: Aruba ta top lista di 10 resortnan all-inclusive den Caribe
Ministernan Hulandes gara ta wak futbol durante reunion Tweede Kamer
DEN HAAG – Dos minister di gabinete Mark Rutte (Cora van Nieuwenhuizen (Infrastructuur) y Ferd Grapperhaus (Justitie en Veiligheid) a wordo gara ta wak wega di futbol durante e di dos dia di e reunion porta mas importante di aña den Tweede Kamer diahuebs, esta e Algemene Beschouwing unda cu ta discuti e plannan presenta durante Prinsjesdag. Unabez cu esaki a bira conoci, e dos mandatario a core reacciona, aceptando nan ‘fout’[ y a pidi disculpa na prome minister Rutte. Diferencia ta cu, compara na Aruba unda cu algun luna prome ora cu (awor ex) parlamentario Sue Ann Ras (MEP), a wordo gara den Eerste Kamer ta wak Netflix durante un presentacion di IPKO door di un periodista Hulandes di Caribisch Netwerk, e no solamente a pidi disculpa pero a entrega retiro. Algo cu e mandatarionan na Hulanda no a haci.
DOS MIDI
Mesora na Aruba a cuminsa cuestiona e asunto aki, unda cu ta papia di midi cu dos midi. Ora cu a gara Ras na Hulanda, a yama esaki algo escandaloso, y cu algo asina ‘no ta posibel na Hulanda’, y cu a ‘ pone cara di Aruba na berguensa’. Critica na tanto Hulanda como Aruba tabata severo. Esaki a pone cu Ras a opta pa no solamente pidi disculpa pero, tuma e decision mas drastico cu ta retira como parlamentario. Aunke su partido (MEP) a pidi pa e reconsidera, el a mustra cu esaki no ta un opcion y cu e no ta sinti cu e por sigui mas. Mesora esaki a wordo tuma na malo tambe ya cu hopi a haya cu ‘e no mester a retira’. Na Hulanda mientrastanto, comentarionan riba e caso di diahuebs tabata grandi.
RUTTE
E prome minister mes durante e conferencia di prensa di diabierna mainta a reacciona cu e tambe ta culpable di e caso aki, pero cu e no ta un punto grandi si bo no tin un rol grandi (durante e reunion), y no mester haci e asunto mas grandi cu e ta.Segun Rutte, nan tabata medio wak e wega y no tabata manera nan a wak e wega completo. Ademas e ta compronde cu si bo tin oranan largo eyden, e acto ey ta comprondibel, pues no a pasa nada malo y no tabata necesario pa pidi disculpa. Ora cu a puntre si e ta na altura di e caso di un parlamentario di Aruba cu a retira pa motibo cu a gare ta wak Netflix, el a bisa cu e no ta na altura di esey. Comentarionan na Hulanda sinembargo (y na Aruba) tabata basta fuerte, y tur contra e mandatarionan nan actuacion. Aki na Aruba e comentarionan ta sigui cu Ras no mester a tuma retiro y cu pasobra ta Hulanda mes, diripiente ‘nada no a pasa’.
Gobierno Hulandes ta evaluando pa stop su paginanan riba Facebook
DEN HAAG – Tin chens cu gobierno di Hulanda por stop su actividad riba e red social Facebook. Esaki pasobra e compania madre di e compania, esta META, no ta dispuesto pa adapta cierto risico pa loke ta informacion personal di persona. Asina secretario di estado Hulandes Alexandra van Huffelen cu tin e cartera di digitalisacion tambe. Un conseho di ‘Autoriteit Persoonsgegevens’ a confirma den un conseho na e ministerio di Binnenlandse Zaken en Koninkrijkrelaties (BZK) di e risiconan en cuestion y a conseha pa no continua cu nan actividad riba Facebook.
Seleccion di futbol Hulandes PSV tin posibilidad pa titula campeon di Hulanda awe nochi
EINDHOVEN – E seleccion di futbol Hulandes PSV tin posibilidad pa titula campeon di Hulanda awe nochi. Awe nochi (ora di Hulanda) tin e partido entre PSV y Sc Heerenveen. Si nan gana, y Feyenoord no logra haya punto contra Go Ahead Eagles, e seleccion di Peter Bosz no por wordo alcansa mas. Hasta si PSV empata contra Heerenveen y Feyenoord perde di Go Ahead, e titulo ta di e ekipo di Eindhoven. Pa PSV, esaki lo ta e prome titulo nacional desde 2018.
Arubahuis a tene un ‘Ban Topa’ cu studiantenan na Den Haag
DEN HAAG – Arubahuis a tene un Ban Topa diaranzon anochi 24 di April cu studiantenan for di e region di Leiden, Den Haag, Delft y Rotterdam. Esaki a tuma lugar na De Haagse Hogeschool y a conta cu presencia di Minister Plenipotenciario mr. Ady Thijsen, Minister di Finanza y Cultura Xiomara Maduro, Minister di Labor, Integracion y Energia Glenbert Croes y directora di Gabinete di Aruba mr. Joselin Croes. Tambe tabata presente directora di Departamento di Recurso Humano (DRH) Omaira Lares.
Na Hulanda, partidonan formando formando gobierno, kier corta ‘eigen risico’ den cuido medico
DEN HAAG – E partidonan politico cu ta formando gobierno nobo na Hulanda ta deliberando pa haci cambionan drastico den cuido medico, particularmente e suma cu e ciudadano tin cu paga su mes, conoci como ‘eigen risico’, pa e haya e cuido. Nan ta sinti cu e suma actual, 358 euro, ta mucho halto. Y ta pensando pa sea baha esaki na mitar of elimina esaki completamente. E ta un deseo ferviente di e partidonan PVV y BBB. Nan ta kere cu e suma halto di eigen risico ta pone cu hopi ta evita pa haya ayudo medico. E otro dos partidonan VVD y NSC ta mas cauteloso, pasobra si elimina e suma, ta kita e concientisacion cu cuido no ta gratis. E intencion ta pa elimina abuso den cuido medico y ta pone hende pensa dos biaha prome nan bay pa e cuido cu porta ta innecesario. Si elimina e suma, e ta costa e pais 3.6 biyon euro pa aña.
Preocupa cu e nivel di gobernacion, Hulanda ta ofrece Aruba y Corsou curso pa por goberna miho
ORANJESTAD/WILLEMSTAD – Pa fortifica e poder di gobernacion riba e islanan di Reino Hulandes den Caribe, Universidad di Utrecht y de Haagse Hogeschool ta cbay ofrece un estudio parcial di ‘bestuurskunde’ hunto cu universidadnan di Aruba y Corsou. Asina e portal utoday di Hulanda ta raporta. E gabinete ta preocupa cu e gobierno di Corsou, segun secretario di estado Hulandes Van Huffelen. E ta plan tambe cu e minister Hulandes di Enseñansa Dijkgraaf a trata recientemente durante su bishita na Aruba y Corsou.
Rey Willem-Alexander no ta wak e serie Maxima pa no irita su mes riba e partinan incorecto cu por tin
AMSTERDAM – Rey Willem-Alexander no tin planea pa wak e serie riba su casa, Maxima. Asina e la declara e siman aki, na e portal Shownieuws. E no kier irita su mes riba e partinan ‘incorecto’ di e serie. “Mi a tende cu e ta un serie bunita, bon hinca den otro, pero mi ta bay irita mi mes na e cosnan cu ta incorecto (den e serie)” e Rey a bisa. E serie, titula Maxima, ta riba television Hulandes, desde diasabra. Maxima ta trata e bida di e Reina, te cu su compromise cu Willem-Alexander. Den e serie tin tambe un escena intimo cu e dosnan. E serie a kibra hopi record di television. Maxima mes a laga sa cu ainda e no tabatin tempo pa wak e serie dramatico.
Follow NoticiaCla
