Besaril: Aruba a haya espacio y no tabatin motibo pa KB

DEN HAAG – ‘Cu e accion tuma door di Gobierno di Aruba, unda a mustra compresion tanto pa e punta di bista di Conseho di Reino como di Staten di Aruba, a conduci cu awe den reunion di Conseho di Reino, Aruba a haya e tempo y trankilidad necesario pa yega na un solucion unda tur partido por haya otro.’ Esaki ta declaracion di Minister Plenipotenciario Guillfred Besaril na final di e reunion di Conseho di Reino.

E mandatario a bisa cu e tin comprension pa e punto di bista di Conseho di Reino. Besaril: ‘Durante e periodo di 2012 te cu 2017 a firma protocol y a haci e palabracionnan entre Hulanda y Aruba, pero cu e Gobierno di e tempo ey no tabata cumpli cu esakinan. Gobierno di Prome Minister Wever-Croes ta bisa loke e ta bay haci y ta haci loke e ta bisa. Pa e motibo aki Conseho di Reino ta mira e seriedad y tin e confiansa cu por yega na un solucion hunto cu Aruba.’

Sr. Besaril ta hopi satisfecho con e reunion a bay. ‘Aruba a haya espacio pa yega na un solucion y no tabata tin motibo pa duna Aruba un ‘aanwijzing’. Nos a mustra awe madurez den nos relacion cu Hulanda y esaki a conta cu aprecio di banda di Conseho di Reino,’ asina Minister Plenipotenciario Guillfred a termina. 

Nota: E potret ta cortesia di Cas di Aruba