Parti di edificio nobo di hospital HOH bou di awa awe!

ORANJESTAD – Awe mainta parti di e edificio nobo di hospital Horacio Oduber, particularmente e parti di Spoed Eisend Hulp (Eerste hulp) a lanta bou di awa. Esaki a consecuencia di un yobida di awacero den e oranan di marduga. Mesora e videonan di e hecho aki a cuminsa circula riba e rednan social. Ta trata di e proyecto multimiyonario (cu ainda no a caba)  cu un dia prome, ainda a haya critica di e propio director di e hospital (Ezzard Cilie) y tambe minister encarga, Dangui Oduber, pa e fayonan cu e compania di construccion y esun responsabel, ta cometiendo. “No ta husto” tabata palabra di e minister riba su pagina di Facebook, reaccionando riba e asunto di inundacion di e edificio nobo.

CRITICA

Segun Oduber, no ta husto cu Aruba tin cu paga pa un trabou inferior, cu ta un proyecto di gobierno anterior. “ Mike Eman a bisa nos, e debe t’ey pa nos tur pag’e y pag’e cu orguyo. Pa esaki nos tur tin cu bay paga” Oduber a bisa. “ No ta husto! Un proyecto cu desde e proceso di destaho a bay robes y toch Mike Eman a opta pa duna un contratista, sin experiencia, e proyecto grandi aki. Esaki ta e consecuencia pa nos tur awe!!” e mandatario a sigui bisa. “Proyecto di hospital cu ta bay costa nos pueblo casi 1 biyon florin. Ainda e proyecto no ta cla y wak un simpel awacero y kico tur el a ocasiona”. Loke a hala atencion ta e parti final di su declaracion” Un proyecto cu ora nos caba di paga p’e ainda no ta bira di pais Aruba, pasobra na final pais Aruba tin e promer opcion pa cumpra esaki na un prijs, cu ta determina pa SOGA” e mandatario a sigui bisa. Na final, el a sigura cu ‘E investigacion lo cuminsa’. 

HISTORIA

Algun aña pasa e proyecto di renobacion y expansion di HOH a cuminsa, unda cu hopi cos a bay robes. E ‘scandal’ di mas grandi tabata e hecho cu a ‘lubida’ di inclui e camber di operacion, pero a bisa despues cu ta no a haya necesario pa haci esaki, pasobra e renobacion di e actual camber tabata ‘recien’. A pone cu mester a añadi esaki costando ainda mas placa. E edificio a pasa den yen di problema y e siman aki ainda tabatin keho (lesa ariba) di propio director, debi cu tabatin problema di holo malo (door di ventilacion malo), cu a pone cu mester a cera e parti di radiologia. Den pasado recien caba mester a evacua tanto personal como e pashentnan pa mal holo cu tabata circula, debi na e tubonan y e sistema di ventilacion cu no tabata traha drechi. Asina tin un sin fin di problema cu e hospital a pasa aden. Den cierto parti, e ta un hoya di edificio, hopi moderno, pero cierto parti a keda inferior, y lo mas ‘fastioso’ ta e costo halto cu esaki tin finalmente. Minister mes ta haci mencion di ‘casi un biyon’, esta 900 miyon florin, y tur pasobra un compania cu no tabata e miho, segun gobierno actual, a haya e destaho pa keda encarga cu e edificio. Mes momento, e instancia cu a keda encarga cu esaki, Stichting Onroerend Goed Aruba (SOGA), a haya hopi critica di hospital mes, pa e forma con e ta atende cu e problema. E videonan ta di pagina di Facebook di minister Dangui Oduber.