FPNA ta firma un ‘Memorandum of Understanding’ cu Gobierno di Aruba

ORANJESTAD – Diamars 19 di september den presencia di Minister di Enseñansa, Ciencia y Desaroyo Sostenibel, Sr. Rudy Lampe y directiva di Fundacion Parke Nacional Aruba (FPNA), a firma un Memorandum of Understanding (MoU) den Hofi Shon Shoco na Parke Nacional Arikok.

E MoU ta fortifica e lasonan entre FPNA y Gobierno di Aruba. E Ministerio di Enseñansa, Ciencia y Desaroyo Sostenibel ya pa e ultimo lunanan ta sondia e diferente opcion pa e alumnonan di Scol pa Ofishi, unda nan por sigui siña y desaroya nan mes, pa asina tin tur e conocemento y experienca na momento cu nan drenta e mercado laboral.

E acuerdo firma cu Gobierno di Aruba ta inclui e intencion pa FPNA yega na realisa un hardin botanico, pa asina por contribui na e bienestar di tur ciudadano. Mientras cu e alumnonan ta traha na FPNA, nan lo yuda desaroya e hardin botanico, un proyecto cu lo realisa durante varios aña y lo sosode den varios etapa. E hardin botanico lo enfoca riba flora local y lo fungi como un hardin, unda lo por haci diferente sondeo cientifico, e lesnan educacional, y realisa e esfuersonan pa conservacion di naturalesa. E hardin botanico ta desaroya specialmente pa e comunidad di Aruba, pero por ta sigur cu nos turistanan tambe lo bishita y experienca e hardin.

FPNA ta sumamente contento di por forma parti di e proyecto aki, mirando cu e ta incorpora e tres pilarnan mas importante di FPNA cual ta conservacion, educacion y recreacion. Sostenibilidad lo ta un tema sigur di hopi importancia, ya cu lo ta explorando diferente manera pa incorpora e trabounan di hardineria na un manera balansa cu Aruba su medio ambiente.