Tjon: Gobierno mester bisa Parlamento pakico no ta ratifica ley di LAFt

ORANJESTAD – Si gobierno enberdad a dicidi (manera cu e raportahe di noticiacla.com ta bisa awe) cu a dicidi di no ratifica e ley cu Parlamento a pasa na juni riba cambio di LAFt, nan tin cu informa Parlamento oficialmente pa medio di un carta. Asina lider di fraccion di MEP, Rocco Tjon a bisa e portal aki diahuebs merdia, reaccionando riba e asunto. Gobierno a informa Conseho di Minister di Reino diaranson, di nan decision. Diabierna RMR ta trata e asunto na Hulanda. 

STAATSREGELING

Segun staatsregeling di Aruba, ratificacion (bekrachtiging) di un ley ta responsabilidad di gobierno. “ Si nan scoge pa no ‘bekrachtig’ un ley, por escrito nan mester informa Staten over di nan argumentonan pa haci tal. Dus si e noticia ta berdad, nos lo mester ricibi e carta aki cu e argumentonan pa nos analisa y tuma un decision” Tjon a bisa. Aki e ta referi na un decision riba e argumentonan cu gobierno a presenta pa den e caso aki, no ratifica e ley.  

ADELANTA SITUACION

Tjon no kier a adelanta riba e pasonan cu Parlamento por tuma unabes nan haya confirmacion cu e decision di gobierno. “No laga nos ‘loop vooruit’ riba esey. Ban wak si ta bin un carta kico e posibel argumentonan lo ta” Tjon a bisa. Riba e pregunta cu si Parlamento lo sinta warda e carta of nan lo adelanta e peticion, Tjon a bisa cu nan ta warda e carta. “Gabinete Wever-Croes semper a traha transparente. Dus mi tin tur confiansa cu nan lo manda informa nos por escrito di nan motibo y e argumentonan, si esey ta nan decision”.

E DECISION

Manera cu noticiacla.com a raporta den forma di primicia diahuebs, Gobierno di Aruba a informa RMR, cu nan lo no ratifica e cambio di ley di LAFt, cu Parlamento di Aruba a aproba na juni ultimo. Esaki ta e carta cu gobierno di Aruba a entrega na Conseho di Minister di Reino (RMR) diaranson, segun e fuentenan fededigno a confirma na noticiacla.com. Manera e portal aki a raporta diaranson caba, gobierno di Aruba a entrega un carta ‘nobo’ na gobierno di Reino, conforme palabracion di e ultimo RMR di dia 30 augustus ultimo. Aruba a haya tempo te dia 20 di september pa esaki. Cu e carta nobo aki, Gobierno ta desvia di e decision di Parlamento, cu tur consecuencia cu esaki por tin. 

E CARTA

Cu e carta aki, gobierno di Aruba ta trankilisa gobierno di Reino pa cu e futuro di e supervision financiero, evitando mas problema entre e dos paisnan. Un ratificacion di e ley di banda di gobierno di Aruba, lo a crea problema cu Hulanda, y posiblemente desemboca den sea un Rijkswet pa supervision financiero, of un KB. E contenido di e carta nobo aki sinembargo, ta evita esaki. Hulanda a laga sa for di cuminsamento, di no ta acepta e amienda aproba pa mayoria di Parlamento na juni, y a bisa cu Aruba tin cu cambia esaki. Aruba a pidi tempo y awor a yega e momento di berdad. 

REACCION ANTERIOR DI TJON

Prome cu su reaccion diahuebs pa noticiacla.com, e lider di fraccion di MEP a reacciona den Bon Dia Aruba  di su determinacion di no lo desvia di e cambio di ley (di LAFt). Mientras cu inicialmente e portal aki a raporta cu e decenlace si e y Thijsen keda para riba nan punto, por bira problematico, lo tin cu wak, depende di gobierno. Y manera nos a bisa tambe, y cu Tjon a confirma merdia, ta keda na gobierno con ta ‘convence e dos personan aki (y e otronan di Parlamento cu a vota pro) pa ‘laga cay’ y ‘acepta’ e decision di gobierno di Aruba’. Di otro banda, e portal aki a compronde cu gobierno no tin nada di convence gobierno, pasobra gobierno (mescos cu tabata pleno derecho di Parlamento pa cambia e ley), tambe ta den nan pleno derecho pa no ratifica un ley cu Parlamento a pasa democraticamente.