Doñonan di fruteria kier importa fruta y berdura di Venezuela

ORANJESTAD - E doñonan di fruteria na Aruba a pidi gobierno di Aruba permiso special pa importa fruta y berdura di Venezuela, debi cu actualmente e situacion di frontera cera, ta aumenta e gastonan mucho. Asina nan a participa na Prome Minister Wever Croes durante un reunion. Gobierno a priminti di lo evalua e peticion y despues bolbe bek cerca e doñonan. 

FRONTERA CERA

Manera conoci, dia 9 di september, Gobierno di Aruba a tuma e decision pa mantene frontera cu Venezuela cera y prolonga e ciere te cu dia 10 di december proximo. Prome Minister, Evelyn Wever-Croes, a indica cu e motibo di e decision aki di Gobierno di Aruba ta, pasobra e situacion di Venezuela ta sigui hopi serio y tambe Aruba ainda ta den e proceso pa trece e pasonan, cu ta necesario pa nos por tin un miho control riba e fluho di persona. 

EVALUA PETICION

“Nos lo evalua e peticion aki y lo tene na cuenta tur e beneficionan pero tambe e riesgonan cu esaki por trece cu ne. Pa mi y pa henter Gabinete Wever-Croes, e interes di comunidad ta na prome luga. Henter e tema di Venezuela ta un dilema constante, na unda cu mester busca un balans den kico ta e interes di pueblo y kico ta e riesgonan pa nos comunidad”, Prome Minister a duna di conoce.

SITUACION DIFICIL

E situacion na Venezuela, Prome Minister a indica, ta trece hopi preocupacion pa Gobierno. Gobierno ta sigui e desaroyonan y ta convivi cu e situacion dificil cu Venezuela ta enfrentando. Tambe Gobierno ta hopi preocupa pa e efecto cu esaki tin riba nos pais, cu sigur ta hopi grandi. Prome Minister a duna di conoce cu tambe tin e preocupacion di e costo enorme cu e stituacion ta trece cu ne, debi specialmente cu Aruba no por importa fruta y berdura for di Venezuela cu e consecuencia cu e prijs pa fruta y berdura ta bira mas caro. 

PETICION

E peticion cu e doñonan di fruteria a trece cerca Prome Minister ta pa permiti importacion di fruta y berdura so un biaha pa siman for di Venezuela y bou condicionnan hopi estricto. E doñonan di fruteria ta garantisa cu prijs di fruta y berdura lo baha considerablemente si trece e productonan aki for di Venezuela.