Oduber: Ta iresponsabel pa e situacion keda manera cu e ta na ATA

ORANJESTAD – “Mi ta haya lamentabel, cu a yega na e situacion aki cu sigur den mi opinion por a evita”. Asina minister di turismo Dangui Oduber a reacciona pa noticiacla.com riba e menasa di welga cu ta colga riba cabes di Aruba Tourism Authority pa otro siman. Manera ta conoci, sindicato STA a menasa gobierno, cu si pa otro siman 26 di september no tin CAO, lo tin accion na ATA. E trahadonan lo a duna luz berde y mandato pa esaki. 

NEGOCIACION

Segun Oduber , pa mas cu 1 aña caba tin negociacion di CAO entre management di ATA y sindicato STA cu ta representa e trahadornan. Gerencia di ATA ta esun cu ta encarga y esun responsabel, pa yega na un acuerdo entre nan y sindicato STA. “Como minister mi mes a wordo aserca pa e sindicato STA y a tene reunion cu e trahadornan pa scucha nan preocupacionnan y purba evita cu nos ta yega akinan. E negosiacion a tuma demasiado tempo y mi ta spera cu tin boluntad di ambos partido pa yega na un acuerdo,” Oduber a sigui bisa.

IMPORTANCIA DI TURISMO

E mandatario ta mustra cu turismo ta demasiado importante, pa tin incertidumbre na e momentonan aki di esunnan cu ta labora na ATA. “Tur trahador mester ta balora, pasobra na final dia, nan ta parti importante di tur e trabounan cu ta haci den turismo. Ta iresponsabel pa e situacion keda manera cu e ta,” Oduber a finalisa bisando.