Gobierno ta informa Hulanda cu no ta ratifica cambio di ley di LAFt

DEN HAAG – Gobierno di Aruba lo no ratifica e cambio di ley di LAFt, cu Parlamento di Aruba a aproba na juni ultimo. Esaki ta e carta cu gobierno di Aruba a entrega na Conseho di Minister di Reino (RMR) diaranson, segun e fuentenan fededigno a confirma na noticiacla.com. Manera e portal aki a raporta diaranson caba, gobierno di Aruba a entrega un carta ‘nobo’ na gobierno di Reino, conforme palabracion di e ultimo RMR di dia 30 augustus ultimo. Aruba a haya tempo te dia 20 di september pa esaki. Cu e carta nobo aki, Gobierno ta desvia di e decision di Parlamento, cu tur consecuencia cu esaki por tin. 

E CARTA

Cu e carta aki, gobierno di Aruba ta trankilisa gobierno di Reino pa cu e futuro di e supervision financiero, evitando mas problema entre e dos paisnan. Un ratificacion di e ley di banda di gobierno di Aruba, lo a crea problema cu Hulanda, y posiblemente desemboca den sea un Rijkswet pa supervision financiero, of un KB. E contenido di e carta nobo aki sinembargo, ta evita esaki. Hulanda a laga sa for di cuminsamento, di no ta acepta e amienda aproba pa mayoria di Parlamento na juni, y a bisa cu Aruba tin cu cambia esaki. Aruba a pidi tempo y awor a yega e momento di berdad. 

CONSECUENCIA

E consecuencia di e carta aki, por ta cu Parlamento mester ‘guli manda abou’ y acepta y sigui dilanti. Di otro banda, tanto e presidente di Parlamento Ady Thijsen como lider di fraccion di MEP, Rocco Tjon a laga sa recientemente, cu Parlamento di Aruba no ta bay desvia di nan voto di juni. De hecho, den edicion di e matutino Bon Dia Aruba di awe diahuebs, e lider di fraccion di MEP ta confirma su determinacion di no lo desvia di e cambio di ley. Esey kiermen cu si e y Thijsen keda para riba nan punto, lo por spera problema cu gobierno. Ta keda na gobierno con ta convence e dos personan aki (y e otronan di Parlamento cu a vota pro) pa ‘laga cay’ y ‘acepta’ e decision di gobierno di Aruba.