Sindicato STA ta menasa gobierno cu accion na ATA

ORANJESTAD - Directiva di STA a duna gobierno ultimatum pa termina cu CAO di ATA prome cu dia 26 di september 2019, sino lo bay tin accion, ta loke nan ta informa pa medio di un comunicado. Segun STA, e directiva di Sindicato di Trahadornan di Aruba (STA) a reuni diaranson atardi 18 di september 2019, 5or cu su miembronan emplea na ATA Suigeneris, pa locual ta trata e situacion pa cu e negociacionnan pa cu e Contrato Colectivo nobo pa e compania. Un reunion bon asisti caminda  e empleadonan a expresa nan mes.

REUNION CU GERENCIA

Directiva di STA a informa, cu nan ta reuniendo cu gerencia di ATA for di november 2018 caba, pa trata na yega na un contrato colectivo bon balansa pa e empleadonan di e compania. Mester bisa cu directiva di STA a entrega un concepto den cual tur e puntonan cu tabata rekeri cambio, ta treci dilanti, pero lamentablemente gerencia di ATA ta keda para fuerte y terco, bisando cu no tin placa pa locual e sindicato a trece den su concepto. Ta tira culpa riba e gobierno actual, cu a manda un carta pa ATA, cu lo ta prohibi nan di duna aumento na e empleadonan, pa locual ta trata nan salario- y beneficionan.

NEGOCIACION TRANCA

Ora e negociacion a tranca, segun STA, a recuri na intermediacion di mediador di gobierno, kende despues di a delibera cu e partidonan a trece un “tussenvoorstel” riba mesa cu tambe gerencia di ATA a bari for di mesa. Directiva di STA ne momentonan ey a dicidi di solicita un reunion cu minister Dangui Oduber conhuntamente cu e empleadonan di ATA. E reunion a concedi pa e mandatario, caminda cu mayoria di e empleadonan a expresa nan malcontento cu gerencia di ATA pa cu nan actitud terco y te hasta a expresa e deseo pa mira un cambio den e gerencia di ATA Suigeneris.

HUISWERK

Segun STA, minister na su turno a bay haci su “huiswerk” caminda el a solicita e structura salarial di ATA Suigeneris y tur e salarionan di e personal, cu te cu dia di awe, segun nos tin comprendi, cu e no a haya tampoco. Tin empleado den ATA cu a penas ta gana Awg. 2,300 pa luna y otro cu ta riba 8 mil, pa no papia mes di gerencia di ATA.

PLACA 

Segun e sindicato, ta tristo pa mira un compania, cu ta genera asina hopi placa, ta trata su empleadonan, cu ta traha cu alma y cuerpo pa pusha nos turismo, di e manera aki. Directiva di STA ta lamenta e actitud terco, cu te cu awe ta hiba na mesa di negociacion, a pesar cu mediador di gobierno a haci tur intento p’e partidonan yega na otro, no ta mira salida pa motibo di terkedad, cu a lo largo lo bay desenboca den un accion di protesta di parti di e empleadonan miembro di STA den e siman venidero.