Stichting Parkietenbos: Nos barionan ta pasando den e pio lunanan

ORANJESTAD - E fundacion di Parkietenbos representando e habitantenan di; Mahuma, Parkietenbos, Buena Vista, Simeon Antonio y Bucutiweg a reuni cu Minister Otmar Oduber y su conseheronan y a haci entrega di un manifiesto. Na promer lugar a reuni pa reclama e holor teribel, cu ta afectando e barionan. Alabes nan kier haya aclaracion riba diferente punto, pa loke ta e situacion di ceramento di e Dump na Parkietenbos y proceso pa yega na un solucion duradero, pa e maneho di desperdicio pa Aruba. 

Durante varios luna e habitantenan di e barionan menciona y awor tambe Dakota y Wayaca ta kehando di gas y holor malo. Tin fuerte indicacion cu fuera di e Dump na Parkietenbos, e holor lo ta bini tambe di Ser’i Teishi y Barcadera.

Un delegacion di e fundacion a bishita Serlimar y tambe Ecogas y a pone nan na haltura di e situacion insoportabel, cu no por continua. Na Ecogas a topa cu un sero di sushi, cu ta e resto di loke ta procesa pa e planta. E sero aki tabata poni riba e tereno patras di nan facilidadnan, cual ta hole malo. Na Ser’i Teishi, caminda cu e bultonan di desperdicio procesa pa Ecogas ta dera tambe, a topa cu un situacion cu e holor ta masha stinki y fuerte mes. 

Ambos compania esta; Ecogas y Serlimar ta informa di parti di e fundacion cu e habitantenan ta sofocando di e gas y holor malo, cu lo ta saliendo di nan tereno- y facilidadnan y cu e habitantenan no por sigui soporta e situacion aki mas.

Minister Otmar Oduber y su conseheronan a informa e miembronan di e fundacion, tocante e forma hopi cla relaciona cu e Ley importante, cu ta bayendo Parlamento y con leu e proceso di destaho publico ta, pa yega na un solucion duradero pa Aruba. E fundacion a gradici pa e enorme trabou, cu ya a haci y ta apoya cualkier ley cu ta bayendo Parlamento, cu ta percura pa soluciona e problema di maneho di desperdicio y cera e dump na Parkietenbos. E barionan y pueblo di Aruba ta demanda un solucion! Hopi kisas no ta compronde ainda, cu aki ta trata di un situacion di urgencia, ta hopi hende den e barionan concerni nan salud ya ta afecta. E periodo aki ta birando un di esunnan di mas pio, pa loke ta holor y gas cu e barionan a yega di pasa den, den e ultimo añanan.  E fundacion ta apoya cualkier iniciativa pa deshaci di e sushedad di Aruba, sinembargo si ta e “Incinerator” ta e solucion mas duradero pa Aruba pa e siguiente 20 pa 30 añanan, anto e decision mester ta corecto y mester tum’e mas pronto cu ta posibel, pa salvaguardia e salud di e habitantenan. Asina e fundacion Stichting Parkietenbos ta desea di informa e habitantenan di e barionan y pueblo di Aruba.