CIBC FirstCaribbean ta organisa un ‘Full Moon Walk’ na San Nicolas cu Stichting Bob Aruba

ORANJESTAD – CIBC FirstCaribbean ta organisa su di dos “Full Moon Walk” e biaha aki na San Nicolas riba diasabra 12 di october 2019. Esaki ta un caminata riba e ruta di Anker na San Nicolas, cual ta cuminsa 7:00 pm y lo termina pa 10:00 pm. E caminata tin diferente meta; un dia nan ta pa recauda fondo pa e Stichting BOB Aruba, como tambe pa e comunidad di Aruba por comparti como famia na Pariba di Brug, disfrutando di e luna yen, cu ta duna un bunita claridad durante e caminata. Na e final di e ruta e participante nan por admira Baby Beach of Rodgers Beach. E prijs ta uno di AWG 20,- y e ta inclui un dry fit T-shirt. 

CIBC FirstCaribbean y Stichting BOB Aruba ta hopi consciente di nos medio ambiente, pa e motibo aki ta pidi e canadornan pa trece nan mesun boter y esaki lo por yen’e na caminda. Tambe ta pidi pa cada persona trece un flashlight, door cu e ta den e oranan di anochi.

Aki na Aruba a organisa 2 evento grandi durante aña 2019. Señora Jamie Bareno, cu ta e representante di e banco, ta e Project Manager di e eventonan aki y ta informa cu esaki ta pues e ultimo caminata di aña 2019 den cuadro di e proyecto di “ Walk for the cure”. Ta invita e comunidad pa yuda sostene y recauda fondo pa e programa di screening pa e damanan di Aruba. E fondonan ta necesario pa mantencion di tur e aparatura necesario pa e sondeo y tambe pa Stichting BOB por sigui brinda e bon servicio pa comunidad. Lo duna update y informacion tocante benta di tickets pa e caminata. Like & Share e Facebook di Stichting BOB Aruba tambe, pa asina por gana tickets pa e caminata. E ticketnan ta disponibel na oficina di IBISA situa na Frankrijkstraat 1, Oranjestad, Aruba desde 16 di september 2019. Ta invita comunidad pa please anota e fecha den e agenda, pa asina por forma parti di e di dos ‘full moon walk’, cu lo ta pa un hopi bon causa.