Na Colombia tambe Mota Engil tin problema cu tardansa di proyecto

BOGOTA/ORANJESTAD – Mientras cu e proyecto di Watty Vos Boulevard ta coriendo retraso, noticiacla.com a compronde cu na Colombia, e mesun compania cu ta responsabel pa e proyecto, Mota Engil, tambe ta responsabel pa un retraso gigantesco, cu ta causando problema serio. Segun e portal Colombiano, El Expectador, na 2016 e multinacional Portugues, Mota Engil, a ricibi 248 di e 541 proyecto di construccion, y tres aña mas laat, nan a entrega apenas 117. Aki na Aruba e proyecto ta coriendo retraso cu menasa di basta multa, pa e fayonan causa durante e construccion. 

MOTA ENGIL

E siman aki e compania Portugues a ‘renuncia’ pa continua cu su obligacion, cu ta afecta mas di 100 mil mucha Colombiano. E prome di juli e aña aki, e alcalde di Manizales, Octavio Cardona, a compara Mota Engil cu e “Odebrecht de la educación en Colombia”. E alcalde a firma un convenio di 20 mil miyon di peso pa 7 cede di scol publico. “E retrasonan aki ta afecta e derecho di educacion di mas di 10.000 mucha di e municipio”. Un dia despues, e gobernador di Antioquia,  Luis Pérez Gutiérrez, a uni su mes na e protestanan. “E mita di e scolnan no a ni cuminsa cu construccion, y e mayoria ta bou di 50% di ehecucion y/of paralisa” Perez a bisa den un conferencia di prensa. Den varios caminda Mota Engil a subcontrata e obranan cu e companianan mas chikito y pa prijs mas barata. 

ARUBA

Na Aruba, for di su comienso, e compania Mota Engil a confronta problema tras di problema, unda cu cada bes tabatin retraso riba varios parti di e proyecto. E proyecto mester a keda entrega completo na augustus 2019, pero esaki no a bira e caso. Dado momento hasta Minister di Infrastructura, Otmar Oduber, a stop di duna fecha di cumplimento di cierto punto, pasobra no tabatin sentido, ya cu no tabata cumpli cu e fecha. Otro problema tabata calidad di trabou, tardansa y mas. E contracto cu gobierno anterior a cera cu Mota Engil, ta pone cu gobierno actual no por haci nada cu nan, te ora cu e proyecto ta completamente cla. A compronde cu awor, parti lo mester ta cla awor y e resto pa fin di aña. A priminti cu e rotondenan lo ta conecta cu tur e otro camindanan pa augustus, pero esaki tampoco no tabata e caso. Mientras cu tabatin intento pa cobransa di multa contra e compania, e compania a laga sa na noticiacla.com caba cu nan ta bringando e cobransanan aki. Cuanto multa a manda pa e compania, no ta conoci pa e portal aki ainda.