Corsou ta conoce su di 18 morto den trafico

WILLEMSTAD – E ciudadano Harry Eisden a bira di diesocho morto den trafico na Corsou. Tabata alrededor di diaranson marduga 01.50’or di anochi central di polis a ricibi notification cu riba Helmin Magno Wiels Boulevard probablemente auto a alcansa un peaton. E patruya cu a yega na e sitio a topa un homber drumi abou cu bastante sla rond su curpa y no tabata duna señal di bida.

For di un investigacion cu polis a realisa na e sitio a resulta cu e homber victima cu probablemente tabata bou di influencia di alcohol, tabata drumi riba caminda. Un pickup cu tabata core riba Helmin Magno Wiels Boulevard direccion rotonde Parasasa a pasa riba e victima y sigui core.

Alrededor di 02.45’or dokter a constata morto di Harry Emanuel Jesus Eisden, nace na Corsou, 25 december 1961 cu a fayece na e sitio debi na e multiple lesionnan cu e la ricibi. Riba ordu di fiscal di Ministerio Publico a tuma e curpa sin bida den beslag pa mas investigacion. Departamento di Trafico ta continua cu e investigacion. NoticiaCla.com ta manda palabra di condolencia na e famianan. E foto ta cortesia di Luzmarie Ster.